د ګذر وکیلانو ته د ۱۷مې ګڼې فرمان تشریح شو
د بغلان د اطلاعاتو او فرهنګ ریاست، د پلخمري ښاروالۍ په همکارۍ، د دغه ښار شاوخوا ۵۰ تنو د ګذر وکیلانو، قومي مشرانو او د ښاروالۍ مسوولینو ته په یوه ناسته کې د عالیقدر امیرالمؤمنین (حفظهالله) د ۱۷مې ګڼې فرمان تشریح کړ او په دې اړه یې یو شمېر پوسټرونه او بروشورونه هم ووېشل.
د بغلان د اطلاعاتو او فرهنګ ریاست د اطلاعاتو آمر وویل: په دې ناسته کې ګډونوالو ته د ناوړه رواجونو، په ځانګړې توګه د فاتحې او خوښیو په مراسمو او همدارنګه له حج څخه د حاجیانو د راستنېدو پر مهال د ترسره کېدونکو ناوړه دودونو په اړه عامه پوهاوی ورکړل شو.
نوموړي زیاته کړه، چې د ۱۷مې ګڼې فرمان د محتوا لرونکي پوسټرونه او بروشورونه هم د ګذر وکیلانو ته وسپارل شول، ترڅو یې د ښار په بېلابېلو سیمو کې ولګوي او له دې لارې خلکو ته عامه پوهاوی ورکړل شي.
ورته مهال، د پلخمري ښار د بېلابېلو ناحیو د ګذر وکیلانو د یادې ناستې له جوړېدو هرکلی وکړ او ژمنه یې وکړه چې د فرمان د محتوا په اړه د خلکو د پوهاوي او په بېلابېلو سیمو کې د پوسټرونو د لګولو په برخه کې به لازمه همکاري وکړي.
۱۴۴۸/۴/۲۰ هـ ق
