سم الله الرحمن الرحيم

د لوى صوفي او شاعر عبدالرحمن بابا د درې سوه يم تلين په اړه د هېواد د اطلاعاتو او فرهنګ د وزير پيغام .

د ډير وياړ ځاى دى چې نن يو ځل بيا په کابل کې د خپلو مفاخرو د يادونې په لړ کې د   پښتو د ستر صوفي ،او خوږ ژبي شاعر عبدالرحمن بابا درې سوه يم تلين د يوې علمي او څيړنيزې غونډې په ترڅ کې نمانځو .

په ريښتيا چې صوفي شاعر او عالم عبدالرحمن بابا زموږ د افغاني ټولنې د هر کور او کهول معنوي پاچا دى ، ښايي زموږ په ټولنه کې داسې کور نه وي چې د عبدالرحمن بابا له نامه او شعر سره آشنا نه وي .

همدغسې زه په زغرده ويلاى شم چې د رحمان بابا په څير شاعري د خپلې ټولنې په رمز او راز له خبرېدو او پوهېدو پرته نشي کېداى ،عبدالرحمن بابا چې نن هم درې سوه کاله وروسته زموږ پر ټولنه او زړونو د خپل جادويي شعر اغېزې ښندي دا د شاعر بابا د شعري کمال تر څنګ دده د علمي تبحر او خپلې ټولنې د پيژندلو کمال هم ښيي .

د درانه شاعر عبدالرحمن بابا د شعرونو يوه لويه ځانګړتيا چې د نړيوال شهکار شعر او ادب په سرخيلانو کې دروي داده چې  د ده شعر څومره طبيعي ښکلى او ساده دى ،هومره ژور فلسفي مفاهيم لري ،چې د ټولنې د هر پاړکي لپاره يو نوى جهان په مخ کې غوړوي .

زه د اطلاعاتو او فرهنګ د يوه خدمتګار په توګه د علومو اکاډومۍ دغه څيړنيز او علمي سمينار جوړول ستايم او دا ژمنه کوم چې په مناسب فرصت کې به د پښتنو ددغه معنوي با‌با شعري ديوان د يوې معنوي او ادبي پانګې په توګه په ښکلې او مناسبه بڼه له سره چاپ کړو ،همدغسې د اطلاعاتو او فرهنګ وزارت له خوا به په پيښور کې د رحمان بابا په مزار کې دده پر قبر ډبرليک نصب او پر مرمرو به وپوښل شي.

په درناوي

عبدالکريم خُرم

د افغانستان د اسلامي جمهوريت

د اطلاعاتو او فرهنګ وزير
١٣٨٦ د عقرب پنځمه