د اسلامي ثقافت د پايتخت په توګه د غزني د پروژو د معرفي کولو غونډه جوړه شوه
کورپاڼه >>

په ٢٠١٣کال کې د اسلامي  ثقافت  د پايتخت  په توګه دغزني د پروژو د معرفي کولو  او د دغو پروژو د تمويلولو په لاره کې د مرستو د جلبولو په خاطر د مرسته کوونکو لومړۍ غونډه  د اطلاعاتو او فرهنګ د وزير او د غزني  کميسيون د رئيس عبدالکريم خُرم په مشرۍ  په کابل کي جوړه شوه .  څه موده مخکې  د افغانستان د اسلامي جمهوريت د جمهور رئيس حامدکرزي له حکم سره سم  په  ٢٠١٣ کال کې د اسلامي ثفافت  د مرکز په توګه د غزني  ښار  کميسيون  د اطلاعاتو او فرهنګ د وزير په مشرۍ او د ښاري پراختيا د وزير انجنير  محمد يوسف  پښتون  په غړيتوب جوړ شو .   د باختر اژانس د خبر له مخې  په دې غونډه کې د فرهنګي مرکزونو  ، د نړيوالو مرستندويو   موسسو او د اسلامي هيوادونو او د يو شمير نورو هيوادونو د سفارتونو استازو ګډون کړى و .  د غونډې په پيل کې د اطلاعاتو او فرهنګ وزير عبدالکريم خُرم د افغانستان په  معاصر تاريخ کې د غزني د ارزښت په باب لنډې خبرې وکړې او ويې ويل  غزني د افغانستان په تاريخ کې په اسلامي دورو کې د فرهنګ  ، فقې  ، هنر ،  معمارۍ او  صنايعو له پلوه  ځانګړى  ځاى  او لوړ مقام درلود.  داطلاعاتو او فرهنګ وزير د طرابلس  د کنفرانس  نتيجو ته چې   د اسلامي هيوادونو د اطلاعاتو او فرهنګ  د وزيرانو په ګډون د ٢٠٠٧  ميلادي کال  په وروستيو وختو کې   جوړ شوى و اشاره وکړه او څرګنده يې کړه  د اطلاعاتو او فرهنګ وزارت وړانديز وکړ چې د افغانستان يو له دوو تاريخي  ښارونو هرات او غزني  د اسلامي ثقافت  د مرکز په توګه انتخاب شي .  د همدې وړانديز  او د برخه والو د پريکړې له مخې و ، چې  غزني  په  ٢٠١٣ کال کې د اسلامي ثقافت  د پايتخت  په توګه ومنل شو .  د اطلاعاتو او فرهنګ وزير په دې غونډه کې په دې برخه کې د کميسيون تيارى  په ډآګه کړ او په پارلمان کې  د غزني ولايت له استازو او خلکو او له حکومت څخه يې وغوښتل چې د تاريخي  آبداتواو د لرغونو  ساحو د بيا رغاونې او احيا کولو په لاره کې  هر اړخيزه  همکاري  وکړي .  دغه راز ده په دې لاره کې  له بهرنيو دوستانو ، نړيوالو مرکزونو ،  مينه والو  سازمانونو او کورنيو موسسو سره د پرله پسې  تماسونو يادونه وکړه .  وروسته د ښاري پراختيا وزير او د کميسيون غړي انجنير محمد يوسف پښتون خبرې وکړې او ويي ويل : د اطلاعاتو او فرهنګ  وزارت د ښاري  پرمختيا وزارت او د نورو فرهنګي مرکزونو په همکارۍ دغزني ښار يو شمير پروژې په دوو برخو د تاريخي آبداتو او د لرغونو ساحو  ترميمول  او دغه راز د ښاري پرمختيا او  د ښاري خدمتونو د وړاندې کولو  پروژې برابرې  او تنظيم کړې  دي .  د ده د څرګندونو له مخې د ښاري پرمختيا   وزارت د ودانيو  د جوړولو ٢٦  ښاري پروژې او دغه راز  په دې باب د تاريخي  آبداتو او د لرغونو ساحو د ترميمولو  ، بيا رغاونې او احيا کولو  د ٤٥ پروژو  د ډيزاين او مطالعاتو  کار  بشپړ کړى دى ،د دوو څلورستاره ، درې ستاره  او دوه  ستاره  هوټلونو او د غزني د هوايي ډګر جوړول د هغو پروژو  له جملې څخه دي  چې د ښاري پرمختيا وزارت وړانديز يې وکړ .  د ده د څرګندونو له مخې تر راتلونکو څلورو کلونو پورې به غزني په داسي  ښار بدل شي چې د نړيوالو ميلمنو کوربه شي .  د پښتون د څرګندونو له مخې دغه پروژې دوه سوه مليونه ډالره لګښت غواړي چې  څه ناڅه شپږ مليونه ډالره يې  د تاريخي آبداتواو د لرغونو ساحو په برخه کې لګول کيږي .  ده دغه راز وويل تراوسه پورې د ماليي وزارت يوازې  له شلو څخه تر پنځه ويشتو  مليونو ډالرو پورې د ورکولو ژمنه کړي ده .   دغه راز ده له نړيوالو موسسو  او دوستانو څخه وغوښتل چې په دې لاره کې د افغانستان له خلکو سره همکارۍ وکړي .  وروسته د اطلاعاتو او فرهنګ وزارت د فرهنګي  معينيت سرپرست محمدضيا افشار  او د ښاري پرمختيا وزارت معين ډاکتر قيام الدين جلال زاده د اړوندو پروژو په باب معلومات ورکړل .   وروسته دغوندې برخه والو  ازادي خبرې  وکړې او د اطلاعاتو او فرهنګ وزير عبدالکريم خُرم او د ښاري  پرمختيا وزير انجنير محمد يوسف پښتون د طرحه شويو پوښتنو په وړاندې څرګندونې وکړې او  ځوابونه يې ورکړل .  برخه والو د ښاري پرمختيا او د ښاري  خدمتونو  د وړاندې کولو په پروژو کې د خصوصي سکتور په رول باندې ټينګار کاوه .  څرنګه چې د تاريخي آبداتو ترميمول  تخصيص  ته اړتيا لري او خصوصي سکتور تراوسه پورې په دي برخه کې  کافي تجربه نه لري  له دې امله ټينګار وشو چې د اطلاعاتو او فرهنګ وزارت دي د تاريخي آبداتو د ترميمولو کار د هغو  نړيوالو  موسسو په همکارۍ چې په

دې برخه  کې  فعاليت کوي په غاړه واخلي.