له کوټې څخه يو شمير راغلي سندرغاړي په تحفو او ستاينليکونو ووياړل شول
کورپاڼه >>

له کوټې څخه د راغلو سندرغاړو او هنرمندانو يوه  ډله  نن په کابل کې د اطلاعاتو او فرهنګ د وزير له خوا په تحفو او ستاينليکونو سره ووياړل شوه .

په هغه کتنه کې چې د  اطلاعاتو او فرهنګ د وزير عبدالکريم خرم او له کوټې څخه د راغلو سندرغاړو او هنرمندانو ترمنځ وشوه، د اطلاعاتو او فرهنګ وزير وويل، سيمه له يوې فاجعې سره مخامخ ده، هڅې داسې روانې دي چې  د ډيورنډ  کرښې  دواړو غاړو ته  د پراته ولس د فرهنګي ودې مخه ونيسي.  نوموړي زياته کړه، چې دا ډول تګ راتګ او  ليده کاته به  زموږ د فرهنګي ودې په لار کې اغېزمن ثابت شي.

له کوټې څخه راغلو سندرغاړو د افغانانو له مېلمه پالنې او مينې څخه قدردانى وکړه او د هغوى صميميت يې وستايه. سندرغاړي د اطلاعاتو او فرهنګ د وزير لخوا په  ستاينليکونو او سوغاتونو و نازول شول. 

هېره دې نه وي، چې دغه سندرغاړي د شمشاد ټلويزيون لخوا کابل ته د کانسرت په موخه را بلل شوي دي.