غور کې لسګونو تنو ځوانانو ته د وړیا زده کړو زمینه برابره شوه

د غور اطلاعاتو او فرهنګ ریاست له لوري د دې ولایت په مرکز کې ۱۲۰ تنو ځوانانو ته د درې میاشتو لپاره د وړیا زده کړو زمینه برابره شوه.
د اطلاعاتو او فرهنګ رئیس د ځوانانو د ټولنیز رول په اړه خبرې وکړې او ویې ویل: ځوانان په ټولو برخو کې مهم او ارزښتمن رول لري، نوموړي زیاته کړه، چې د وړیا ښوونیز مرکز د پرانیستلو څخه موخه د ویناوالۍ، کمپیوټر او انګلیسي ژبې په برخو کې د ځوانانو د علمي کچې لوړول دي.
نوموړي ټینګار وکړ، چې د اطلاعاتو او فرهنګ ریاست ژمن دی، چې ځوانانو ته لا ډېرې ښوونیزې اسانتیاوې برابرې کړي.
ورته مهال ځوانانو د اطلاعاتو او فرهنګ ریاست د دې نوښت ستاینه وکړه او ویې ویل: د داسې وړیا ښوونیزو پروګرامونو جوړېدل کولای شي د ځوانانو لپاره د زده کړو فرصتونه او په دې برخه کې اسانتیاوې لا زیاتې کړي.
د یادونې وړ ده، چې دا پنځمه دوره ده، چې د غور د اطلاعاتو او فرهنګ ریاست د ځوانانو چارو آمریت سلګونو ځوانانو ته د وړیا زده کړو زمینه برابروي.

۱۴۴۷/۱۲/۲۲ هـ ق