د فارياب والي د اطلاعاتو او کلتور وزير سره وکتل
پنجشنبه ( ۲۳ د ربیع الثاني ۱۴۴۷) د فارياب والي مولوي عبدالاحد فضلي د اطلاعاتو او کلتور له وزير ښاغلي شيخ شیراحمد حقاني صاحب سره په وزارت مقام کې وکتل.
ښاغلي فضلي په فارياب ولايت کې د سيلانيانو لپاره د خدماتو او اسانتیاو په څرنګوالي خبرې وکړې او ويې ويل: فارياب ولايت د سياحتي جاذبو او تاريخي آبداتو په درلودو سره د سيلانيانو لپاره د تفريح يو له بهترينو ولايتونو څخه دی، که فرصتونه برابر شي، فارياب ته به د بهرنيو او کورنيو سیلانيانو څپې راماتې شي، چې ورسره به ډيری کاري فرصتونه هم برابر شي او ځوانانو ته به د کار زمينه برابره شي.
د اطلاعاتو او کلتور وزير ښاغلي شيخ شیراحمد حقاني صاحب د فارياب والي ته ډاډ ورکړ، چې دې برخې ته ځانګړې پاملرنه کېږي، په بېلابېلو برخو کې به سيلانيانو لپاره به لازم سهولتونه برابر شي، تر څو د سيلانيانو څپې فاریاب ته ورماتې شي او د دې صنعت له لارې هيوادوالو ته د کار زمينه برابره او د فارياب د خلکو په ژوند کې مثبت بدلون راشي.
۱۴۰۴/۷/۲۴ هـ ل
