د کندهار په اطلاعاتو او کلتور رياست کي د اخلاق حسنه تر عنوان لاندي علمي سمینار تر سره شو

دغه سمينار چي د ځوانانو چارو آمریت له لوري دائر شوی و، د حافظ مولوي بخت محمد زعفراني له لوري لسګونو  ځوانانو ته د نیکو اخلاقو د پیژندنې ترڅنګ، د نیکو او حسنه اخلاقو پر دنیوي او اخروي ګټو هر اړخیزه معلومات وړاندې شول.
ښاغلي زعفراني وویل، مسلمانانو  ته ګټه رسول، خلکو ته  ضرر نه رسول، زغم درلودل، په ورین تندي باندې د خلکو سره مخامخ کېدل د ښو اخلاقو څخه شمېرل کيږي. 
 هغه د نيکو اخلاقو د ګټو په اړه وويل: چي په حسنه اخلاقو سره د نبي کریم (ص) آوامر پر ځای کیږي، د جنت لار ده، د انسان په زړه کي قوت پیدا کیږي، د انسانانو تر منځ شخړې او جنجالونه حل کیږي، په ښو اخلاقو سره د زړه سکون راځي او د انسانانو په زړونو کي محبت پیدا کیږي.
وروسته ښاغلي زعفراني د ځوانانو څخه وغوښتل، چې وخت بې ځایه تېر نه کړي، خپل استعداد په کار واچوي او خپل اخلاق او ژوند د نبي کریم (ص) د ژوند سره برابر کړي.
د یادونې وړ ده، چي د اطلاعاتو او کلتور ریاست  له لوري د ځوانانو د علمي ظرفیت لوړونې په موخه بېلابېلي غونډې او علمي سمينارونه وخت پر وخت جوړیږي.

۱۴۴۶/۳/۲۹ هـ ق
۱۴۰۳/۷/۱۱ هـ ل