د اطلاعاتو او فرهنګ وزارت نشراتي معين هرات ته سفر وکړ

د اطلاعاتو او فرهنګ وزارت د نشراتو معین حیات الله مهاجر فراهي هرات ولايت ته د سفر په ترڅ کې نن د ياد ولايت د اطلاعاتو او فرهنګ رياست له مشر او کارکوونکو سره وکتل .
په دغه کتنه کې د هرات د اطلاعاتو او فرهنګ رئيس مولانا حقاني د نشراتو معین ته د ښه راغلاست تر څنګ د خپلو فعاليتونو او کړنو په هکله معلومات ورکړل او خپلې ستونزې يې ورسره شريکې کړې.
نوموړي همدارنګه د ځوانانو، تاريخي ابداتو، اطلاع رسونې او ګرځندوی په برخه کې د ترسره کړو فعاليتونو په هکله مفصل معلومات وړاندې کړل.
حقاني زياته کړه، په هرات ولايت کې د فرهنګي چارو د لا ښه والي په موخه لازمو امکاناتو ته اړتيا لري.
په ورته وخت کې د اطلاعاتو او فرهنګ وزارت د نشراتو معین په خپلو خبرو کې وويل، چې په تېر رژيم کې ياد وزارت په لوی لاس له پامه غورځول شوی و.
ده يو ځل بيا ټينګار وکړ، چې د اطلاعاتو او فرهنګ وزارت د نشراتو د پخواني برم د بېرته اعاده کولو لپاره به هلې ځلې وکړي.
نوموړي ډاډ ورکړ، چې په هرات کې خپرېدونکې د اتفاق اسلام ورځپاڼې د رنګه چاپ او پراختيا لپاره کار روان دی او د باختر آژانس د کاري کيفيت د لوړولو په موخه به کوټلي ګامونه واخلي.
د يادونې وړ ده، چې مهاجر فراهي په نږدې راتلونکي کې هرات ته د اطلاعاتو او فرهنګ وزارت د سرپرست د سفر خبر ورکړ او د ياد ولايت د اطلاعاتو او فرهنګ له رئيس سره يې ژمنه وکړه، چې ستونزې به يې د حل په موخه د اطلاعاتو او فرهنګ له سرپرست وزیر سره شريکې کړي.