د فاریاب پوهنتون کتابتون ته سلګونه ټوکه کتابونه ډالۍ شول
د اطلاعاتو او کلتور وزارت د عامه کتابتونونو ریاست د عامه کتابتونونو د پیاوړتیا او د مطالعې کلتور د دودولو په موخه د فاریاب پوهنتون عامه کتابتون ته ۶۲۱ ټوکه د عصري او دیني علومو کتابونه ډالۍ کړل.
د اطلاعاتو او کلتور رئيس مولوي شمسالدین محمدي د عامه کتابتونونو رياست د دې ارزښتمن اقدام ستاینه وکړه او ویې ویل: چې دا ګام د ځوان نسل د علمي او فکري پیاوړتیا په برخه کې ډېر مهم دی، نوموړي هیله څرګنده کړه، چې دغه ډالۍ به د محصلینو د مطالعې او څېړنې کچه لوړه کړي.
همدارنګه د فارياب پوهنتون رئيس مولوي محمد محق د اطلاعاتو او کلتور وزارت له دوامداره ملاتړ څخه مننه وکړه، هغه د محصلینو لپاره د علمي سرچینو د لاسرسي پر اهمیت ټینګار وکړ او زیاته یې کړه؛ چې دغه کتابونه به د ځوانانو لپاره د څېړنې او علم د پراختیا نوي فرصتونه برابر کړي؛ نوموړي وویل: د دې ډول ملاتړ په مرسته فاریاب پوهنتون کولای شي، په سیمه کې مخکښ علمي او څېړنیز مرکز وګرځي.
بلخوا د اطلاعاتو او کلتور وزارت د خپرونو چارو معینیت له لوري هم ۱۰۰ ټوکه نور کتابونه دې کتابتون ته ډالۍ شوي دي، چې دا کار د محصلینو او فرهنګیانو له تود هرکلي سره مخ شوی دی.
۱۴۴۶/۷/۲۴ ق
۱۴۰۳/۱۱/۶ ل
