د اطلاعاتو او کلتور وزیر د یوه پلاوي په مشرۍ هرات ولایت ته سفر وکړ
د اطلاعاتو او کلتور وزیر شیخ شیر احمد حقاني د خپرونو چارو معین ښاغلي مهاجر فراهي په ملتیا د هرات ولایت د اطلاعاتو او کلتور ریاست، سیمیز موزیم، عامه کتابتون، تیاتر نوې ودانۍ، اختیارالدین کلا، د هریوا دارالفنون او ټاپې پروژې څخه لیدنه وکړه.
د اطلاعاتو او کلتور وزیر شیخ شیر احمد حقاني د دغې لیدنو پر مهال د تاریخي میراثونو د ساتنې پر اهمیت ټینګار وکړ او ویې ویل: د هېواد تاریخي آبدات زموږ د ملي هویت مهمه برخه جوړوي او موږ ژمن یو چې د دغو میراثونو د ساتنې، بیارغونې او راتلونکو نسلونو ته د پېژندنې لپاره عملي او دوامدارې هڅې ترسره کړو.
ښاغلي شیخ شیر احمد حقاني د اړوندو مسؤلینو ترسره کړې کړنې وستایلې او د چارو د لا ښه والي، د کلتوري پروګرامونو پر پیاوړتیا او خلکو ته د لازیاتو خدماتو ترسره کولو باندې یې ټینګار وکړ.
وزیر صاحب اړوندو مسؤلینو ته په بېلابېلو برخو کې اړینې سپارښتنې وکړې او زیاته یې کړه، چې د کلتوري او ښوونیزو مرکزونو پراختیا کولای شي، د ځوان نسل د پوهاوي په لوړولو او د هغوی د تاریخ او کلتور سره د اړیکو په پیاوړتیا کې مهم رول ولوبوي.
هرات کې د ټاپي پروژې د پرمختګ له بهیره د لیدنې پر وخت ښاغلي حقاني زیاته کړه، چې د ټاپي په څېر د ملي او سیمهییزو لویو پروژو پلي کېدل د اقتصادي ثبات د ټینګښت، د کاري فرصتونو د رامنځته کېدو او د سیمې د هېوادونو ترمنځ د باور د کچې د لوړېدو لامل ګرځي.
ورته مهال د اطلاعاتو او کلتور ریاست، سیمیز موزیم، عامه کتابتون، تیاتر، اختیارالدین کلا، د هریوا دارالفنون او ټاپې پروژې مسؤلینو د اطلاعاتو او کلتور وزیر او ورسره مل پلاوي ته ښه راغلاست ویلو ترڅنګ زیاته کړه، چې په کلتوري، هنري، اطلاعاتي او اقتصادي برخو کې پراخې هڅې روانې دي او ټول کارکوونکي په دوامداره توګه خلکو ته د ښه خدمتو وړاندې کولو په موخه هڅې کوي.
ښاغلي شیخ حقاني د انجیل ولسوالۍ د ده مهري په کلي کې د نامعلومو وسلهوالو په برید کې د شهیدان شویو هېوادوالو د فاتحې په مراسمو کې هم ګډون وکړ.
۱۴۴۷/۱۱/۱ هـ ق
