هرات کې د لوېدیځ زون د مخکښو رسنیزو کسانو درېیمه کلنۍ جشنواره ترسره شوه

د (لوېدیځ زون د مخکښو رسنیزو کسانو) درېیمه کلنۍ جشنواره د هرات ولایت د اطلاعاتو او کلتور رئیس، سیمه‌ییزو مسئولینو، فرهنګیانو، د پوهنتون استادانو، د رسنیو مسئولینو او خبریالانو په شتون کې په دغه ولایت کې ترسره شوه.
دغه جشنواره د لوېدیځ زون د رسنیو او خبریالانو د ملاتړ او څارنې کمېټې له لوري د هرات د اطلاعاتو او کلتور ریاست او د یو همکار خیریه بنسټ په همکارۍ جوړه شوه.
د لوېدیځ زون د رسنیو او خبریالانو د ملاتړ او څارنې کمېټې رئیس وویل: د دې جشنوارې په درېیم پړاو کې رسنۍ او خبریالان په ۱۴ بېلابېلو برخو کې نوماند شوي وو او په پای کې غوره کسانو د ارزونې پلاوي د پرېکړو له مخې بېلابېلې جایزې ترلاسه کړې.
ورته مهال د اطلاعاتو او کلتور رئیس په ټولنه کې د رسنیو مهم رول ته په اشارې سره ټینګار وکړ، چې اسلامي امارت د رسنیو او خبریالانو ملاتړ ته ژمن دی او د اطلاعاتو او کلتور ریاست هڅې کوي، چې خبریالانو ته د اطلاع رسونې او نورو برخو کې لا ډېرې اسانتیاوې رامنځته کړي.
د غونډې ویناوالو د عامه افکارو په روښانولو کې د رسنیو رول حیاتي وباله او د داسې پروګرامونو جوړول یې د رسنیزو خپرونو د کیفیت لوړولو او د خبریالانو ترمنځ د سالمې سیالۍ د رامنځته کولو لپاره مهم ګام یاد کړ.

۱۴۴۷/۱۱/۲ هـ ق