د افغانستان او قطر ترمنځ د ګرځندوی په برخه کې د همکاریو پر پراختیا خبرې وشوې
د اطلاعاتو او فرهنگ وزارت د ګرځندوی، مالي او اداري معین مولوي قدرتالله جمال په کابل کې د قطر دولت له سفیر ډاکټر علي مردف القاشوطي سره په لیدنه کې د افغانستان او قطر ترمنځ د ګرځندوی په برخه کې د همکاریو پر پراختیا او پیاوړتیا خبرې وکړې.
په دې لیدنه کې د افغانستان او قطر ترمنځ د دوستانه او ورورولۍ اړیکو پر لا پراختیا ټینګار وشو او د قطر دولت له لوري له افغانستان سره د شویو همکاریو او ملاتړ قدرداني وشوه.
د لیدنې په مهمو موضوعاتو کې له قطر څخه افغانستان ته د سیلانیانو د جذب، د افغانستان د طبیعي، تاریخي او سیاحتي جاذبو د معرفي کولو، په افغانستان کې د قطري پانګهوالو د پانګونې د زمینه برابرولو او د دواړو هېوادونو ترمنځ د ګرځندویي همکاریو لپاره د رسمي چوکاټ د رامنځته کولو موضوعات شامل وو.
د ګرځندوی، مالي او اداري معین د افغانستان د ګرځندویي ظرفیتونو په اړه معلومات وړاندې کړل او څرګنده یې کړه, چې افغانستان د طبیعي ښکلاوو، تاریخي آبداتو، لرغونو سیمو او بېلابېلو سیاحتي جاذبو له پلوه د پام وړ ظرفیتونه لري او د قطري سیلانیانو او پانګهوالو لپاره د همکاریو مناسب فرصتونه موجود دي.
ورته مهال، د قطر دولت سفیر ډاکټر علي مردف القاشوطي د افغانستان او قطر ترمنځ د اړیکو پر اهمیت خبرې وکړې او فرهنګ یې د تمدنونو یو اساسي عنصر وباله. نوموړي زیاته کړه، چې تمدنونه په اسانۍ له منځه نه ځي او انسانان د تمدنونو په رامنځته کولو، پاللو او وده کې مهم رول لري.
د قطر سفیر همداراز د دواړو هېوادونو ترمنځ د فرهنګي اړیکو پر اهمیت ټینګار وکړ او د افغانستان او قطر ترمنځ یې د اړیکو د لا پراختیا او د ګډو همکاریو د پیاوړتیا په برخه کې د دوامدار تعامل پر اړتیا خبرې وکړې.
۱۴۴۸/۴/۱۱ هـ ق
