لغمان کې (د ناوړه دودونو او باطلو افکارو د مخنیوي) په نوم یو ورځنی سیمینار ترسره شو
لغمان کې د الصارم فکري او فرهنګي ادارې او د اطلاعاتو او فرهنګ ریاست له لوري، د الینګار ولسوالۍ اړوند د شیخ صاحب سیمې قومي مخورو، ځوانانو او د ښوونځیو او دیني مدرسو زده کوونکو ته (د ناوړه دودونو او باطلو افکارو د مخنیوي) په نوم یو ورځنی سیمینار ترسره شو.
د اطلاعاتو او فرهنګ رئیس مولوي عبدالنور رسولي وویل: د ۱۷مې ګڼې فرمان، چې د ناوړه دودونو د مخنیوي په موخه صادر شوی، د عامه پوهاوي لړۍ یې په دې موخه روانه ده، چې خلک د اسلامي شریعت له احکامو او لارښوونو سره سم ژوند وکړي او له هغو دودونو څخه ډډه وکړي، چې د خلکو ته د ستونزو د جوړیدو لامل کېږي.
نوموړي زیاته کړه، چې د ټولنې د اصلاح، د ځوانانو د فکري روزنې او د ناسمو دودونو د له منځه وړلو لپاره د دیني عالمانو، قومي مخورو، ځوانانو او ښوونیزو ادارو ګډه همکارۍ مهمه ده او هر څوک باید د عامه پوهاوي په برخه کې خپل مسؤلیت ادا کړي.
په سیمینار کې نورو ویناوالو هم د باطلو افکارو، په اسلامي نظام کې د اطاعت، د ټولنیز نظم د ساتنې، د ناوړه دودونو د مخنیوي، د اسلامي لارښوونو پر رعایت، د فتنې او تفرقې د مخنیوي، د ناسمو افکارو پر وړاندې د پوهاوي او د ټولنې یووالي د اهمیت په اړه هر اړخیزې خبرې وکړې او له ګډونوالو څخه یې وغوښتل، چې د دیني عالمانو له لارښوونو څخه په ګټه اخیستنې سره د ټولنې د فکري اصلاح په برخه کې فعاله ونډه واخلي.
د مسؤلینو په وینا؛ د دغه سیمینار موخه د سیمې د اوسېدونکو، په ځانګړي توګه د ځوانانو او زده کوونکو د اسلامي لارښوونو، فکري پوهاوي او د ناوړه دودونو او باطلو افکارو د مخنیوي په اړه د عامه پوهاوي لوړول وو.
۱۴۴۸/۵/۱۰ هـ ق
