هلمند او نورستان ولایتونو کې ځوانانو ته د وړیا زده کړو زمینه برابره شوه
د هلمند ولایت د اطلاعاتو او فرهنګ ریاست اړوند ښوونیزو مرکزونو کې شاوخوا ١٣٠٠ تنو زده کوونکو ته د فکري او اصلاحي پروګرامونو ترڅنګ د کمپیوټر پروګرامونو، عربي او انګلیسي ژبو د زده کړو زمینه برابره شوه، همدرانګه د نوستان ولایت د اطلاعاتو او فرهنګ ریاست اړوند ښوونیزو مرکز کې شاوخوا ۲۰۰ تنو زده کوونکو ته د فکري او اصلاحي پروګرامونو ترڅنګ د ژورنالیزم، ویناوالۍ، انګلیسي ژبې او کمپیوټر پروګرامونو د زده کړو زمینه برابره شوه.
د دواوړو ولایتونو د اطلاعاتو او فرهنګ ریاستونو مسؤلین وايي؛ چې د ځوانانو فکري روزنه او د هغوی لپاره د عصري زدهکړو زمینه برابرول یې کاري لومړيتوب دی، ځوانان باید د دیني علومو ترڅنګ په عصري علومو او مسلکي مهارتونو هم سمبال شي، ترڅو د هېواد او ټولنې په پرمختګ کې اغېزمن رول ولوبوي.
مسؤلینو همداراز د انګلیسي او عربي ژبې، کمپیوټر پروګرامونو، ژورنالیزم او ویناوالۍ زدهکړې د اوسني عصر له مهمو اړتیاوو څخه وبللې او ټینګار یې وکړ، چې د دغو مهارتونو زدهکړه ځوانانو ته د علمي پرمختګ او د ټولنې د خدمت زمینه برابروي.
ورته مهال ځوانانو د دغو وړیا زده کړو زمینې برابرولو څخه خوښي څرګنده کړه او د ولایتونو نورو ولسوالیو ته هم د دغو خدماتو د پراختیا غوښتونکي شول، ترڅو بېوزله ځوانانو ته هلته هم د زده کړو مناسب فرصتونه برابر شي.
۱۴۴۸/۴/۲۱ هـ ق
