نورستان کې شپنۍ مشاعره ترسره شوه
د نورستان اطلاعاتو او فرهنګ رياست له لوري د عامه کتابتون په انګړ کې شپنۍ مشاعره ترسره شوه، چې پکې د اطلاعاتو او فرهنګ ریاست مسؤلینو ترڅنګ ګڼ شمېر شاعرانو، فرهنګیانو، لیکوالانو او د شعر او ادب مينوالو ګډون کړی و.
د اطلاعاتو او فرهنګ رئیس مولوي سميع الحق حق بیان وویل: شعر او شاعري د ټولنې فکري هنداره ده، چې د خلکو د احساساتو د راویښولو وسیله پاتې شوې ده.
نوموړي له شاعرانو څخه وغوښتل چې خپلو شعرونو له لارې ناوړه دودونو مخنيوي وکړي، ولسي ستونزې راونغاړي او له بې هدفه شاعرۍ څخه ډډه وکړي.
په ياده مشاعره کې شاعرانو بېلابېل شعرونه، نظمونه، تنزیه کلامونه غونډې ګډونوالو ته واورول، چې د ګډونوالو لخوا یې تود هرکلي وشو.
شاعرانو خپلو شعرونو کې خلک ورورګلوي، مینې او د نظام ملاتړ ته راوبلل او د هېواد ابادۍ چارې یې وستایلې.
د مشاعرې ګډونوالو د فرهنګي ارزښتونو د پیاوړتیا په برخه کې دغه ډول ادبي ناستو دوام مهم وباله او د ورته پروګرامونو د دوام غوښتنه وکړه.
۱۴۴۷/۱۱/۲۹ هـ ق
