نیمروز کې د اسلامي معلوماتو سيالي تر سره او غوره ګډونوال یې په بېلابېلو ډالیو وستایل شول
د نيمروز د اطلاعاتو او فرهنګ رياست او د الرباط فکري او فرهنګي ادارې په ګډو همکاریو د ۵۰۰ تنو ځوانانو ترمنځ د اسلامي معلوماتو (عقايدو، سيرت او فقهې احکامو) سيالۍ ترسره شوه او لسګونه تنه ګډونوال یې د یوې غونډې په ترڅ کې په بېلابېلو ډالیو وستایل شول، په دې اړه جوړه شوې غونډه کې د سیمه ییزو ادارو مسؤلینو، د الرباط فکري او فرهنګي ادارې استازو، علمای کرامو، استادانو او ګڼ شمېر ځوانانو ګډون کړی و.
د اطلاعاتو او فرهنګ رئیس وویل: دغه سیالۍ د ځوانانو روزنې، د عامه پوهاوي او علمي ظرفيت لوړولو په موخه ترسره شوه، ښاغلي الهام ځوانانو ته ډاډ ورکړ، چې د دوی د روزنې او علمي ظرفیت لوړولو په برخه کې به پوره هڅې وکړي.
په غونډې کې نورو ویناوالو هم د علم د ارزښت په اړه خبرې وکړې او ویې ویل: هر انسان بايد خپل تاريخ، د ټولنې ستونزې او همداراز خپل مسؤلیت وپېژني، اسلامي شریعت د شرعي علومو ترڅنګ عصري علومو ته هم ځانګړی ارزښت ورکړی دی.
ویناوالو له ګډونوالو وغوښتل چې خپل وخت په بې ځایه مصروفیتونو کې تېر نه کړي او د خپل علمي ظرفیت لوړولو په برخه کې دې پوره هڅې وکړي.
د يادونې وړ ده، چې د یادې سیالۍ لومړي مقام ګټونکي ته یو لپ ټاپ کمپیوټر، دویم مقام ګټونکي ته یو سیټ موبایل، دریم مقام ګټونکي ته یو لاسي ساعت او یو شمېرو نورو مخکښو ګډونوالو ته بېلابېلې ډالۍ ورکړل شوې.
۱۴۴۸/۵/۱۲ هـ ق
