کندهار کې د ۱۷ مې ګڼې فرمان د لا ښه تطبیق په موخه ستره غونډه وشوه

د اطلاعاتو او کلتور وزارت د خپرونو چارو معینیت په کندهار ولایت کې د عالیقدر امیرالمؤمنین (حفظه الله) د ۱۷ مې ګڼې فرمان د لا ښه تطبیق په موخه غونډه وشوه، چې پکې علماء کرامو، د یو شمېر امارتي ادارو مسؤلینو، قومي مخورو، خپرندویانو او د رسنیو استازو ګډون کړی وو.
غونډې ته په رالېږل شوي پیغام کې، عالیقدر امیرالمؤمنین (حفظه الله )دا ډول غونډې جوړول د خیر او اصلاح سرچینه وبللې او زیاته یې کړه؛ چې د فتنو په  زمانه کې الله (ج) موږ ته د اجتماعي خدمت موقع راکړې، باید په ګډه ولس له شریعت سره اشنا کړو. 
دغه راز په پیغام کې ټینګار شوی، چې دا نظام د جهاد ثمره ده او دلته به د نفساني غوښتنو پر ځای یوازې د الهي دین لوړوالي او د اسلامي امارت شرعي موقف ته کار کېږي. 
عالیقدر امیرالمؤمنین حفظه الله د تېرو خلافتونو د له منځه تللو اصلي لامل د رعیت بې اطاعتي او خپلمنځي ستونزې وبللې او له ټولو څخه یې وغوښتل چې د نظام د مثبتو کړنو په انعکاس او د جهادي اثارو په خوندیتوب کې همکاري وکړي، څو راتلونکی نسل جهاد ته وهڅول شي.
ورته وخت کې د خپرونو چارو معین ښاغلي مهاجر فراهي وویل: د امیرالمؤمنین (حفظه الله) د فرامینو تطبیق ته باید عملي لارې چارې ولټول شي او مسئولین باید لومړی له ځان څخه اصلاح پیل کړي، ښاغلي فراهي له خطیبانو، قومي مخورو، لیکوالانو، خپرندویانو او رسنیو څخه وغوښتل چې د ناوړه دودونو په مخنیوي او د امیرالمؤمنین (حفظه الله) د حکمونو په رسولو او تکثیر کې مهم رول ترسره کړي.
د کندهار والي، د جهادي آثارو د تنظیم او راټولو رئیس قاري عبدالستار سعید او یو شمېر نورو ویناوالو افغانان د بې ساري کارنامو خاوندان وبلل او ویې ویل: په تېرو څلورو لسیزو کې د دوو سترو امپراطوریو ماتول یو لوی تاریخ دی، چې باید په دقیق ډول ولیکل او ثبت شي، دوی په وينا؛ د شوروي د یرغل تاریخ په سمه توګه نوي نسل ته ونه رسېد، چې له بده مرغه د نوي نسل ځینې کسان کمونستان هم اتلان بولي؛ نو ځکه اسلامي امارت د تېر ۲۰ کلن جهاد او تېرو مبارزو د خاطراتو او اثارو پر آرشیف کولو ځانګړی تمرکز لري. 
وینا والو زیاته کړه، چې د ټولنې ضروریاتو د حل لپاره اسلامي نظام یو امیر لري، ترڅو د ټولنې د ټولو اړخونو په حل کې د اسلامي شریعت موافق پریکړې وکړي، دلته د هر وزارت، ادارې او عامې ټولنې لپاره  لوایح، فرامین او مقررې جوړیږي، چې پر مونږ تاسو یې تعمیل واجب ده.

۱۴۴۷/۱۰/۲۵ هـ ق