د اطلاعاتو او فرهنګ وزارت د معین صاحبانو او فرهنګي اتشهوو ترمنځ د زمري۲۴مې (فتحې ورځې) په مناسبت د همغږۍ آنلاین غونډه وشوه
د اطلاعاتو او فرهنګ وزارت د بهرنیو اړیکو او فرهنګي اتشهوو ریاست په نوښت، د یاد وزارت د معین صاحبانو او په بهرنیو هېوادونو کې د افغانستان د فرهنګي اتشهوو ترمنځ د زمري۲۴مې (فتحې ورځې) په مناسبت د همغږۍ آنلاین غونډه ترسره شوه.
په دې غونډه کې د اطلاعاتو او فرهنګ وزارت د ګرځندوی، مالي او اداري معین مولوي قدرتالله جمال، د خپرونو چارو معین ښاغلي مهاجر فراهی، د فرهنګ او هنر معین شیخ عبدالرحمن طیبي، د بهرنیو اړیکو رئیس محمد شفیق احمدزي، په بهرنیو هېوادونو کې د افغانستان فرهنګي اتشهوو او د وزارت یو شمېر اړوندو مسئولینو ګډون کړی و.
له غونډې جوړولو څخه موخه د زمري۲۴مه د اسلامي امارت د فتحې ورځې په مناسبت د ترسره کېدونکو فرهنګي، هنري، رسنیزو او سیاحتي پروګرامونو په اړه لازمې همغږۍ رامنځته کول او فرهنګي اتشهوو ته د وزارت د معین صاحبانو له لوري لازمې لارښوونې وړاندې کول و.
د فرهنګ او هنر معین شیخ عبدالرحمن طیبي د زمري۲۴مې د لا ښه نمانځنې پر اهمیت خبرې وکړې او له فرهنګي اتشهوو څخه یې وغوښتل چې په اړوندو هېوادونو کې د فرهنګي او هنري پروګرامونو له لارې د افغانستان تاریخ، فرهنګ، هنر، ملي هویت او تاریخي او فرهنګي میراثونه معرفي کړي. نوموړي ټینګار وکړ، چې یاد مناسبت باید یوازې تر تشریفاتي مراسمو محدود نه شي، بلکې د افغانستان د فرهنګي ارزښتونو د معرفي کولو لپاره ترې اغېزمنه ګټه واخیستل شي.
دغه راز د خپرونو چارو معین ښاغلي مهاجر فراهی د زمري۲۴مې د رسنیز کول پر اهمیت ټینګار وکړ. نوموړي همدارنګه د فرهنګي اتشهوو دنده وبلله، چې د کوربه هېوادونو له رسنیو او فرهنګي بنسټونو سره په همغږۍ د افغانستان د تاریخ او فرهنګ په اړه مستند او باوري معلومات خپاره کړي.
ورته مهال د ګرځندوی، مالي او اداري معین مولوي قدرتالله جمال وویل: د زمري۲۴ مه د فتحې ورځ د افغانستان له وحدت، ثبات، امنیت او خپلواکۍ سره ځانګړی تړاو لري. نوموړي د دې ورځې د نمانځنې په پروګرامونو کې د افغانستان د تاریخي، فرهنګي، سیاحتي او طبیعي جاذبو د معرفي کولو پر اړتیا هم ټینګار وکړ او زیاته یې کړه، چې په بهر هېوادونو کې کلتوري اتشې کولی شي د کوربه هېوادونو له سیاحتي بنسټونو، ګرځندوی شرکتونو او فرهنګي ادارو سره د اړیکو له لارې د افغانستان د سیاحتي ظرفیتونو په معرفي کولو کې اغېزمن رول ولوبوي.
په دې آنلاین غونډه کې د افغانستان د اسلامي امارت د فتحې په لاره کې د شلو کلن جهاد پر مهال د شهیدانو قربانۍ او فداکارۍ هم یادې شوې. ګډونوالو د هغو مجاهدینو او ولسونو د قربانیو یادونه وکړه، چې د هېواد د آزادۍ، اسلامي ارزښتونو، خپلواکۍ او ملي حاکمیت لپاره یې د اشغال پر وړاندې مبارزه کړې ده.
همدارنګه ټینګار وشو، چې د زمري۲۴مې د فتحې ورځې د پروګرامونو له لارې باید د افغانستان د تاریخ، فرهنګ، هنر، ملي هویت، تاریخي آثارو، لرغونو سیمو او طبیعي ښکلاوو په اړه د کوربه هېوادونو خلکو ته معلومات وړاندې شي او له شته فرهنګي او رسنیزو فرصتونو څخه اغېزمنه استفاده وشي.
په پای کې، په بهرنیو هېوادونو کې د افغانستان فرهنګي اتشهوو د زمري۲۴ مې په مناسبت د خپلو پلان شویو پروګرامونو، فعالیتونو، نظرونو او وړاندیزونو په اړه معلومات وړاندې کړل او د لا ښه همغږۍ او تنظیم په موخه یې خپل وړاندیزونه شریک کړل.
د غونډې ګډونوالو ټینګار وکړ، چې د دغې ورځې په مناسبت باید د افغانستان د فتحې او ملي ارزښتونو د یادونې ترڅنګ، په بهر کې د هېواد تاریخ، فرهنګ، هنر، سیاحت او فرهنګي میراثونو د معرفي کولو لپاره اغېزمن فرهنګي او رسنیز فرصت وګرځول شي.
۱۴۴۸/۲/۲۹ هـ ق
