د اطلاعاتو او فرهنګ وزارت اړوند نوي رییسان معرفي شول
د افغانستان اسلامي امارت د ریاستالوزراء مقام د حکم پر بنسټ، د اطلاعاتو او فرهنګ وزارت اړوند د قرآنکریم لیکلو او بیهقي کتاب خپرولو ریاست پخوانی رییس مولوي عبدالعلیم ځانواک مفتيزاده د ورځپاڼو ریاست رییس په توګه، د ورځپاڼو ریاست پخوانی رییس انجینر عزیر بریالی د پلان او پالیسۍ ریاست د رییس په توګه او د امارتي شرکتونو د ساتنې او مراقبت ریاست پخوانی آمر نعمتالله سعیدي د قرآنکریم لیکلو او بیهقي کتاب خپرولو ریاست د رییس په توګه معرفي او خپلې دندې یې پیل کړې.
په دې اړوند جوړه شوې غونډه کې د اطلاعاتو او فرهنګ وزارت د ګرځندوی، مالي او اداري چارو معین مولوي قدرتالله جمال، د خپرونو چارو معین ښاغلي مهاجر فراهي، د دغه وزارت یو شمېر مرکزي ریاستونو رئیسانو او د یادو ریاستونو کارکوونکو ګډون کړی و.
د اطلاعاتو او فرهنګ وزارت مسؤلینو په دې غونډه کې د دندو د ترسره کولو پر مهال پر اخلاص، ژمنتیا او د مسوولیت په درک کولو ټینګار وکړ او له نویو رییسانو څخه یې وغوښتل؛ چې د چارو د ښه والي، غوره خدمتونو وړاندې کولو او د وزارت د موخو ترلاسه کولو په برخه کې په جدي توګه هڅې وکړي. همداراز، د وزارت د بېلابېلو برخو ترمنځ د لا زیاتې همغږۍ او د مناسب کاري چاپېریال د رامنځته کولو په اړه لازمې سپارښتنې هم وشوې.
ورته مهال نویو رییسانو د رهبرۍ له باور څخه د مننې ترڅنګ ژمنه وکړه، چې د ورسپارل شویو دندو په ترسره کولو کې به له خپلو ټولو شته وړتیاوو او ظرفیتونو څخه استفاده وکړي او د خپلو اړوندو برخو د چارو د لا ښه پرمخ وړلو لپاره به پوره هڅې وکړي.
۱۴۴۸/۳/۱۹ هـ ق
