د لوحو او تبلیغاتي تابلوګانو د اصلاح کمېسيون نوبتي غونډه وشوه
د اطلاعاتو او کلتور وزارت د خپرونو چارو د معين ښاغلي مهاجر فراهي په مشرۍ د لوحو او تبلیغاتي تابلوګانو د اصلاح کمېسيون نوبتي غونډه ترسره شوه.
د غونډې په پیل کې د کمېسیون د منشي له لوري د تیرو پریکړو په اړه هراړخیز معلومات وړاندې شول.
همدا راز په دې غونډه کې د کابل نړیوال هوايي ډګر اړوند د لوحو او اعلاناتي تابلوګانو اصلاحي راپور د تطبیق په موخه تایید شو او د ۲۰۰ نويو کلمو او اصطلاحاتو معیاري بدیل موندنې په موخه پریکړه وشوه، چې د افغانستان علومو آکاډمۍ او کابل پوهنتون استازو ته وسپارل شول، تر څنګ يې د کېمسیون ساحوي پروګرامونو کې بهرنیو او بي مفهومه اصطلاحاتو او کلمو د پیژندنې پر اړتیا ټینګار وشو.
د یادونې وړ ده، چې د لوحو او اعلاناتي تابلوګانو د اصلاح پروګرامونو د لا ښه والي په موخه د کميسيون غړو هم د بېلابیلو موضوعاتو په اړه خپل نظریات او وړاندیزونه شریک کړل.
۱۴۴۷/۴/۱۵ هـ ق
