عبدالمنان شېواى شرق: اطلاعاتو ته د لاسرسي قانون د حساب ورکولو، شفافيت او ښې حکومتوالۍ لاره پرانيستونکى دى
اطلاعاتو ته د لاسرسي قانون په اړوند د پوهاوي ورکولو غونډه نن په اطلاعاتو او فرهنګ وزارت کې جوړه ش
د باختر آژانس خبريال د خبرله مخې؛ دغه غونډه د اطلاعاتو او فرهنګ وزارت د اطلاع رسونې مرجع، اطلاعاتو ته د لاسرسي کمېسيون په همکارۍ جوړه کړه.
د غونډې په پيل کې د اطلاعاتو او فرهنګ وزارت د خپرونو چارو معين عبدالمنان شېواى شرق اطلاعاتو ته د لاسري قانون په اړه معلومات ورکړل او ويې ويل: اطلاعاتو ته د لاسرسي قانون چې په ٦ فصلونو او ٤١ مادو کې نافذ دى؛ کولاى شي په افغانستان کې د حساب ورکولو، شفافيت او ښې حکومتوالۍ لاره پرانيستونکى وګڼل شي.
هغه زياته کړه چې د اطلاعاتو او فرهنګ وزارت، اطلاعاتو ته د لاسرسي قانون د پراختيا او خپرونو په لاره کې د صوتي او تصويري رسنيو له لارې اطلاع رسونې او پوهاوي ورکولو ته ژمن دى او په دې برخه کې زياتې هلې ځلې کوي.
وروسته اطلاعاتو ته د لاسرسي کمېسيون مرستيالې نجيبې مرام په خبروکې وويل چې اطلاعاتو ته د لاسرسي قانون په اړوند عدالت غوښتنه او پوهاوي ورکول د دغه کمېسيون له کارونو څخه دي.
هغې زياته کړه چې اطلاعاتو ته لاسرسى ښې حکومتوالۍ، شفافيت او حساب ورکولو ته زمينه برابروي.
اطلاعاتو ته د لاسرسي کمېسيون غړې زهرا موسوي هم اطلاعاتو ته د لاسرسي قانون د ازرښت په اړوند خبرې وکړې او ويې ويل چې اطلاعاتو ته لاسرسى، د ادارو د چارو د ښه والي لپاره اغېزمن دى.
په همدې ترتيب اطلاعاتو ته د لاسرسي کمېسيون تخنيکي سلاکار ولي الله مصباح اطلاعاتو ته د لاسرسي قانون په اړه تصويري معلومات وړاندې کړل او ويې ويل چې د نړۍ د ١٣٠ هېوادونو ترمنځ د افغانستان اطلاعاتو ته د لاسرسي قانون لومړى مقام ګټلى دى.
هغه وويل چې اطلاعاتو ته لاسرسى په تصميم نيونو کې د خلکو د مشارکت زمينه برابروي او د ادارو د چارو د ښه والي سبب کېږي
کابل/ د کب ٤مه/ باختر.
