د رسنیو له مسؤلینو او خبریالانو سره د همغږۍ ناسته وشوه
فراه کې د اطلاعاتو او فرهنګ وزارت د خپرونو چارو معین مولوي مهاجر فراهي، پر ټوليزو رسنيو د څار رئیس مولوي صفي الله رائد او په لویدیځ زون کې د خبریالانو د خوندیتوب کمېټې مسؤل شميل احمد مشعل په شتون کې د رسنیو له مسؤلینو او خبریالانو سره د همغږۍ ناسته شوه.
د فراه د اطلاعاتو آمر د رسنیو د وضعیت په اړه د معلوماتو وړاندې کولو پر مهال وویل: اوس مهال په دغه ولایت کې ۱۴ رسنۍ فعالیت کوي، د دغه ولایت رسنۍ په ټولیزه توګه په ۲۴ ساعتونو کې له ۱۴ تر ۱۸ ساعتونو خپرونې خپروي.
ورته مهال د خبریالانو د خوندیتوب کمېټې مسؤل شمیل احمد مشعل وويل: په فراه کې اطلاعاتو ته لاسرسی د تير په پرتله ښه شوی او د دولتي ادارو ویاندویان له خبریالانو سره ښه همکارۍ لري. همدارنګه په ناسته کې خبریالانو خپلې ستونزې او وړاندیزونه هم شریک کړل.
دغه راز پر ټولیزو رسنیو د څار رئیس مولوي صفي الله رائد د رسنیو د ستونزو د حل په برخه کې د هر اړخيزو هڅو ډاډ څرګند کړ او زياته يې کړه، چې د رسنیو د ستونزو د حل په موخه له اړوندو ادارو سره ناستې ترسره شوي، ښاغلي رائد د خبریالانو وړاندیزونو ته د رسېدو ډاډ هم ورکړ.
۱۴۴۸/۵/۳۰ هـ.ق
