نیمروز کې د رسنیو له مسؤولینو او خبریالانو سره د همغږۍ ناسته وشوه
د نیمروز ولایت د اطلاعاتو او کلتور د رئیس مفتي حبیب الله الهام په مشرۍ د ځایي رسنیو مسؤلینو او خبریالانو سره د همغږۍ ناسته وشوه.
د ناستې په پیل کې مفتي حبيبالله الهام ګډونوالو ته د ښه راغلاست تر څنګ د ناسمو رواجونو، مخدره موادو او انساني قاچاق اړوند د امیرالمؤمنین حفظه الله فرامین او همدا راز د ترافيکي اصولو په اړه د عامه پوهاوي د خپرونو د چمتو کولو اړوند هر اړخیزې سپارښتنې وکړې او د رسنيو له مسؤلينو او خبريالانو څخه یې وغوښتل چې د امیرالمؤمنین حفظه الله د فرمانونو ښه پلي کولو په برخه کې د نشراتي پالیسۍ او د ټولنې د غوښتنو او اړتیاوو سره سم پروګرامونه چمتو او خپاره کړي.
په دغه ناسته کې د خبريالانو د خونديتوب کمېټې مسؤول عبدالغفار عزيزي د اطلاعاتو او کلتور ریاست له همکارۍ څخه د مننې ترڅنګ په ټولنه کې د اسلامي نظام د لاسته راوړنو، فعالیتونو خپرولو او انعکاس ورکولو کې د خبریالانو پر رول ټینګار وکړ او د امارتي مسؤولینو له ملاتړ، همغږۍ او اطلاعاتو ته د لاسرسي څخه خوښي څرګنده کړه.
په ورته وخت کې د رسنیو مسؤلینو او خبریالانو د اطلاعاتو او کلتور له رياست څخه د رسنيو سره د دوامداره همکاریو په اساس خوښي څرګنده کړه او خپلې ستونزې او وړانديزونه يې له اړونده مسؤلینو سره شريک کړل.
۱۴۴۷/۳/۲۴ هـ ق
