په سرپل کې د (فکري یرغل) په نوم د علمي او فرهنګي سیالۍ پایلې اعلان شوې
د سرپل اطلاعاتو او کلتور ریاست له لوري د البرز علمي او فرهنګي ادارې په همکارۍ چې د سلګونو ځوانانو ترمنځ د (فکري یرغل) په نوم علمي او فرهنګي سیالي ترسره شوې وه، پایلې اعلان او ۲۰ تنه مخکښ ګډونوال یې په بېلابېلو ډالیو او ستاینلیکونو وستایل شول.
مسؤلینو د فکري جګړې په اړه خبرې وکړې او له ځوانانو څخه یې وغوښتل چې په علمي او فرهنګي برخو کې له شته فرصتونو په بشپړه توګه ګټه واخلي او د خپل علمي ظرفیت لوړولو په موخه هڅې وکړي.
دغه راز مسؤلینو د اسلام مبارک دین د بشریت لپاره بشپړ او روښانه دین وباله او ویې ویل: د داسې پروګرامونو موخه یوازې د سیالۍ ترسره کول او د ډالیو ویشل نه دي، بلکې د ټولنې د لوی او راتلونکي جوړونکي قشر په توګه د ځوانانو فکري وده او د مسئولیت مننې روحیې پیاوړی کول دي، ځکه ځوانان د نظام او ملت اصلي پانګه ده او نن نظام باخبره، ژمنو او خدمتکوونکو ځوانانو ته اړتیا لري، ترڅو د هېواد د آبادۍ او خلکو ته د خدمت کولو په برخه کې اغېزمنې هڅې وکړي.
۱۴۴۷/۱۱/۲ هـ ق
