د اسلامي امارت له بیا ځلې حاکمیت سره په کافرکوټ لرغونې سیمه کې د غیرې قانوني چارو مخه نیول شوې ده
دغه څرګندونې د اطلاعاتو او فرهنګ وزارت د فرهنګ او هنر معین مولوي عتیق الله عزیزي د یو پلاوي په مشرۍ خروار ولسوالۍ اړوند کافر کوټ لرغونې سیمې ته د سفر پرمهال وکړې.
په دغه سفر کې له ښاغلي عزیزي سره د لرغون پوهنې رئیس سید ذبیح الله سادات، د تاریخي ابداتو رئیس محمد نسیم نسیمي، د عامه کتابتونونو رئیس دوکتور رفیع الله صمیم، د لوګر ولایت د اطلاعاتو او فرهنګ رئیس مولوي ثواب جان اسلامیار، د خروار ولسوال مولوي محمد ایوب خادم او یو شمېر نورو مسؤلینو ملتیا کوله.
د فرهنګ او هنر معین مولوي عتیق الله عزیزي یادې سیمې ته د سفر موخه د تاریخي ځایونونو د ساتنې په پار د خروار ولسوالۍ له مسوولینو سره لیدنه او د عالیقدر امیرالمومنین(حفظه الله) د فرمان مطابق د تاریخي او لرغونو سیمو ساتنه وبلله او ویې وویل: د خروار ولسوالۍ اړوند کافرکوټ سیمه د هېواد په کچه تاریخي مخینه او ارزښت لري، چې تاریخي مخینه یې پنځم او شپږم میلادي پېړیو ته رسېږي.
ښاغلي عزیزي زیاته کړه، چې له دې وړاندې کافرکوټ سیمې کې په غیرقانوني توګه ډېرې کېندنې شوې وې، چې د اسلامي امارت له بیا ځلې حاکمیت سره د غیرقانوني چارو مخه نیول شوې ده.
دغه راز د لوګر اطلاعاتو او فرهنګ رئیس وویل: د تاریخي او لرغونو سیمو د ساتنې په برخه کې د اطلاعاتو او فرهنګ ریاست بشپړه پاملرنه کړې ده او تېر کال د اطلاعاتو او فرهنګ وزارت اړوند د لرغون پوهنې مسلکي ټیم له لوري د کافرکوټ لرغونې سیمې حدودونه مشخص شوي دي.
ورته مهال د لرغون پوهنې رئیس سید ذبیح الله سادات وویل؛ د کافرکوټ لرغونې سیمه د هېواد په کچه ارزښتمنه سیمه ده، چې ډېره بډایه مخینه لري، د تېرو پېړیو لرغوني اثار ترې لاسته راغلي او لا هم پرې څېړنې روانې دي.
د یادونې وړ ده، چې لوګر کې د مس عینک لسګونه لرغونو سیمو سربېره له ۲۵۰ څخه زیاتې لرغونې سیمې شتون لري.
۱۴۴۸/۱/۱۳ هـ ق
