بامیانو کې د خطاطۍ او نقاشۍ سیالیو پایلې اعلان شوې

بامیانو کې د ښکلو هنري اثارو دوه ورځنی نندارتون او سیالي، چې د دغه ولایت د اطلاعاتو او فرهنګ ریاست له لوري په فرهنګي مرکز کې پیل شوې وه، پای ته ورسېده او د سیالۍ پایلې اعلان شوې، همدارنګه دغه نندارتون او سیالي، د نقاشۍ، خطاطۍ، حکاکۍ او میناتورۍ هنري آثارو ته ځانګړې شوې وه.
د بامیانو د اطلاعاتو او فرهنګ رئیس قاري سید مصطفی صالح وویل: په دغه نندارتون کې ۷۰ هنرمندانو ګډون کړی و او د نقاشۍ، خطاطۍ، حکاکۍ او میناتورۍ په برخو کې یې له ۱۸۰ څخه زیات هنري آثار نندارې ته وړاندې کړي وو.
نوموړي د دغه هنري نندارتون او سیالۍ موخه د هنرمندانو هڅول، ملاتړ او د دوی د استعدادونو پېژندل یاد کړل او زیاته یې کړه؛ د اطلاعاتو او فرهنګ ریاست په پام کې لري، چې په راتلونکي کې هم د هنري آثارو نور نندارتونونه او سیالۍ جوړې کړي.
ګډونوالو د دغه ډول سیالیو او نندارتونونو د جوړولو هرکلی وکړ او دا یې د هنرمندانو د ملاتړ او هڅونې لپاره مهم او ارزښتمن اقدام یاد کړ. ګډونوالو له مسؤلینو څخه وغوښتل چې ورته پروګرامونو د په دوامداره توګه جوړ شي.
د یادونې وړ ده، چې د اطلاعاتو او فرهنګ ریاست له لوري د دغې سیالۍ مخکښوو ګډونوالو ته ستاینلیکونه هم ورکړل شول.

۱۴۴۸/۵/۱۹ هـ ق