د میلاد النبيﷺ په مناسبت مشاعره او د مشاعرو د تنظیم قانون تشریحي غونډه جوړه شوه

د پروان ولایت د اطلاعاتو او کلتور ریاست له لوري د حضرت محمد مصطفیﷺ د مبارک میلاد په مناسبت شپنۍ مشاعره او د مشاعرو د تنظیم قانون تشریحي غونډه جوړه شوه، چې پکې لسګونو شاعرانو، د ترنم بلبلانو، د ادب مینه والو، ځوانانو، فرهنګي او علمي اشخاصو، ادیبانو او د ولایت بېلابېلو ادارو استازو ګډون کړی وو.
د غونډې په پیل کې د اطلاعاتو او کلتور رئیس مولوي شمس‌الحق صدیقي ګډونوالو ته ښه راغلاست تر څنګ وویل: نننۍ مشاعره د حضرت محمد مصطفی ﷺ د مبارک میلاد په مناسبت او د امیرالمؤمنین حفظه‌الله له لوري د مشاعرو د تنظیم قانون د تشریح او عامه پوهاوي لپاره جوړه شوې ده، ترڅو مشاعرې د یاد قانون د محتوا مطابق ترسره شي او زیاته یې کړه؛ چې شعر باید د قوم، ژبې، سمت پالنې الفاظ ونه لري او یو شاعر باید د اسلامي اصولو په رڼا کې شاعري وکړي، ترڅو ټولنه مثبت لوري ته رهبري کړي.
د غونډې یو شمېر ویناوالو وویل: شاعر باید تل د شریعت په چوکاټ کې خپل شعرونه ولیکي او الله تعالی د هغو شاعرانو ستاینه کوي، چې د خپلو شعرونو په منځپانګه کې د اسلام مبارک دین، هېواد او د جهاد ارزښتونه راونغاړي، د ویناوالو له لوري د هغو شاعرانو هڅې وستایل شوې، چې د اسلامي امارت د مجاهدینو کړنو، کارنامو، لاسته راوړنو او د جهادي جذبو بهیرونه ته یې د شعر په ژبه انعکاس ورکوو.
 همداراز راغلو شاعرانو او د ترنم بلبلانو د میلاد النبيﷺ د مقام او عظمت په اړه خپل ترتیب کړي شعرونه د ترنم په ژبه وړاندې کړل او د امیر المومنین حفظه الله تعالی له لوري د مشاعرو د تنظیم قانون ستاینه وکړه او ټینګار يې وکړ چې د ا ډول معنوي او فرهنګي غونډې دې لا دوام ومومي.
د یادونې وړ ده، چې د غونډې په پای کې د فرهنګ او ګرځندوی آمر له لوري د مشاعرو تنظیم قانون تشریح شو.
۱۴۴۷/۳/۱۰هـ ق