د ګرځندوی سکتور د پياوړتیا په موخه د ( ۲۵۳۴ ) سياحتي شرکتونو ارزونه ترسره شوې 

د اطلاعاتو او کلتور وزارت د ګرځندوی، مالي او اداري چارو معينيت روان کال په هيواد کې د شاوخوا ( ۲۵۳۴) سياحتي شرکتونو له چارو ارزونه ترسره کړې ده.
په دې ارزونه کې د یادو شرکتونو د خدماتو په څرنګوالي، له سیلانيانو سره د برخورد او تعامل، د ګرځندوی د قوانينو د بشپړ تطبیق، له جواز څخه د استفادې د څرنګوالي او نورې اړوندې چارې په جدي ډول ارزول شوي دي.
د ګرځندوی، مالي او ادارو چارو معينيت مسؤلينو د سیاحتي شرکتونو مالکينو ته په جدي ډول سپارښتنه کړې ده، چې له جواز څخه ناوړه ګټه اخېستنه، په ځانګړي توګه د انساني قاچاق په برخه کې د جواز د لغوه کېدو او عدلي او قضايي ارګانونو ته د ورپېژندل کېدو سبب ګرځي، په همدې اساس باید د ټولو سياحتي، زيارتي او درماني شرکتونو مالکين له جواز څخه د ناوړه ګټې اخېستو څخه په کلکه ځان وساتي.
د اطلاعاتو او کلتور وزارت د سياحتي، زیارتي او درماني شرکتونو تنظيم له خپلو کاري لومړيتوبونو څخه ګڼي، چې د یاد وزارت په هڅو د شرکتونو لپاره د جوازونو د ویش بهير کې اسانتیا، د هيواد او ولاياتو په کچه  یوه واحده اتحاديه رامنځته کول او د یادو شرکتونو کارونه له قانون سره سم برابرول  يې د یادونې وړ دي.

۱۴۴۷/۸/۱۰ هـ ق