پروان کې د مطالعې او کتاب لوستنې فرهنګ د ودې په موخه یو ورځنی سیمینار وړاندې شو
د اطلاعاتو او فرهنګ وزارت د عامه کتابتونونو ریاست د پروان د اطلاعاتو او فرهنګ ریاست په همکارۍ د مطالعې او کتاب لوستنې د فرهنګ د عامولو په موخه ګڼ شمېر زده کړیالانو او زده کوونکو ته یو ورځنی سیمینار وړاندې کړ، چې پکې یو شمېر سیمهییزو مسؤلینو هم ګډون کړی و.
د پروان د اطلاعاتو او فرهنګ رئیس مولوي شمسالحق صدیقي د دغه سیمینار موخه په ټولنه کې د مطالعې فرهنګ عامول وبلل او ویې ویل: د انسان فکري او علمي وده له مطالعې او کتاب سره تړلې ده. نوموړي ټینګار وکړ، چې ځوانان باید د خپلې خوښې څانګې بشپړې کړي، د ټولنې اړتیاوې وپېژني او د ستونزو په حل او د هېواد په پرمختګ کې اغیزمن رول ولوبوي. ښاغلي صدیقي همدارنګه په کتابتونونو کې شته امکاناتو ته په اشارې سره له ګډونوالو څخه وغوښتل چې د علم او پوهې په ترلاسه کولو سره د ټولنې په وده او پرمختګ کې فعاله ونډه واخلي.
د اطلاعاتو او فرهنګ وزارت اړوند د عامه کتابتونونو رئیس دوکتور رفیعالله صمیم وویل: د عامه کتابتونونو اداره د مطالعې او کتاب لوستنې فرهنګ د پراختیا لپاره بېلابېل پروګرامونه ترسره کوي. نوموړي زیاته کړه، چې اسلام انسانان لوستلو ته هڅوي او د تاریخ د سترو پوهانو بریاوې هم د مطالعې پایله وه. ښاغلي صمیم له ځوانانو وغوښتل چې د مطالعې له لارې د نړۍ له حالاتو خبر شي، تاریخ مطالعه کړي او د ودې، پرمختګ او ټولنې ته د خدمت په لاره کې ګامونه پورته کړي. نوموړي همدارنګه د مطالعې پر وړاندې د خنډونو د پېژندلو او له منځه وړلو او د کتاب لوستنې د سیالیو د ملاتړ غوښتنه وکړه.
د یادونې وړ ده چې د غونډې په پای کې د عالیقدر امیرالمؤمنین حفظه الله د (۱۷) ګڼې فرمان په اړه د عامه پوهاوي پاڼې، چې د ودونو، فاتحو او د حج او عمرې څخه د راستنېدو پر مهال د ناسمو دودونو د مخنیوي په اړه د پروان د اطلاعاتو او فرهنګ ریاست له خوا چاپ شوې وې، ګډونوالو ته ووېشل شول.
۱۴۴۷/۱۲/۳۰ ھـ ق
