د هرات اختیارالدین کلا کې ۱۲۰ غرفو کې لاسي صنایع او هنري اثار نندارې ته وړاندې شول
د هرات د اطلاعاتو او فرهنګ ریاست په همکارۍ، د ترکیې هېواد اړوند ټیکا دفتر له لوري د سیاحت له اوونۍ سره هممهاله، د دغه ولایت په اختیارالدین تاریخي کلا کې د لاسي صنایعو او هنري اثارو څلورم نندارتون جوړ شو.
د هرات د اطلاعاتو او فرهنګ ریاست مسوولین وویل: په دغه نندارتون کې د لاسي صنایعو او هنري اثارو د نندارې او معرفي کولو په موخه ۱۲۰ غرفې جوړې شوې دي، چې له ډلې یې ۵۰ غرفې نارینهوو او ۷۰ غرفې ښځینهوو ته ځانګړې شوې دي، مسؤلینو زیاته کړه، چې د دغه نندارتون د جوړېدو موخه له سیمهییزو هنرمندانو او صنعتکارانو ملاتړ او د هغوی د هنري اثارو او تولیداتو د معرفي کولو لپاره د مناسبې زمینې برابرول دي.
ورته مهال، په هرات کې د ټیکا دفتر رئیس ښاغلی کورشات ازدمیر وایي، چې دغه ادارې په هرات کې د هنري، فرهنګي او ټولنیزو برخو کې شاوخوا ۲۰۰ پروژې پلې کړې دي.
د نندارتون ګډونوالو د دغه ډول نندارتونونو له جوړېدو هرکلی وکړ او ویې ویل: دا ډول پروګرامونه د محصولاتو د معرفي کولو، د لاسي صنایعو د پلور او له خلکو سره د هنرمندانو د مستقیمې اړیکې لپاره مناسبه زمینه برابروي.
همداراز، د هرات د هنرمندانو اثار او تولیدات پراخو بازارونو ته ور وپېژندل په موخه د غرفو مسوولینو د لا ډېرو ملي او نړیوالو نندارتونونو د جوړېدو غوښتنه هم وکړه.
۱۴۴۸/۴/۱۴ هـ ق
