پکتیا کې د قلموالو مبارزینو ترمنځ د همغږۍ غوڼده وشوه

د پکتیا اطلاعاتو او فرهنګ ریاست کې د ځوانانو چارو آمریت په همغږۍ د قلموالو مبارزینو تر منځ د فکري او رسنیزې مبارزې پیاوړتیا، یووالي، انسجام او همغږۍ په موخه غوڼده وشوه.
 په پیل کې د پکتیا پوهنتون د کمپیوټر ساینس پوهنځي استاد احسان الله نظري د غونډې ګډونوالو ته د ډیټا او انټرنیټي خوندیتوب په اړه معلومات وړاندې کړل.
ښاغلي نظري د سوشل میډیا بېلابېلو Platforms خوندي کارونې او پر هغو لارو چارو او تخنیکونو خبرې وکړې چې په کارولوسره یې کاروونکی په انټرنیټ کې خپله ډیټا خوندي ساتلی شي.
دغه راز د اطلاعاتو او فرهنګ وزارت د خپرونو چارو معینیت مشاور او د قلموالو مبارزینو مسوول ښاغلي مولوي خالقیار احمدزي د عالیقدر امیرالمؤمنین (حفظه الله) د ۱۷مې ګڼې فرمان د ښه تطبیق په موخه د دې ولایت په لرې پرتو ولسوالیوکې د قلموالومبارزینو پرمټ د پوهاوي پروګرامونو په اړه ترتیب شوې طرحه تشریح کړه، چې په خبره یې په نږدې راتلوونکي کې به یې عملي چارې پیل شي. 
د پکتیا اطلاعاتو او فرهنګ رئیس مولوي فیض الله جوهري وویل: قلموال مبارز ځوانان د اسلامي نظام، ټولنې او اسلامي ارزښتونو اصلي ساتوونکي دي، دوی دې خپل مسؤلیت په ښه ډول او پوره اخلاص سره ادا کړي. ښاغلي جوهري زیاته کړه، هغه مغرضې کړۍ چې د اسلامي نظام په وړاندې بې ځایه او غلط تبلیغات کوي، قلموال مبارز ځوانان دې په وړاندې غښتلې مبارزه او دفاع وکړي.
ښاغلي جوهري ډاډ څرګند کړ، چې اطلاعاتو او فرهنګ ریاست په دغه برخه کې د قلموالو مبارزو ځوانانو بشپړ ملاتړ کوي او یاده مبارزه به په ګډه او همغږۍ ترسره کوي.

۱۴۴۷/۱۲/۶ هـ ق