د اطلاعاتو او فرهنګ وزارت مالي او اداري معین هلمند ولايت ته سفر وکړ
سه شنبه ( ۱۴ د شوال المکرم ۱۴۴۵) د اطلاعاتو او فرهنګ وزارت مالي او اداري معین مولوي سعد الدین سعید هلمند ولایت ته سفر وکړ.
نوموړي د خپل سفر پر مهال د اطلاعاتو او فرهنګ ریاست د رئیس الحاج حافظ عبد الباري "راشد"، د اطلاعاتو آمر مولوي شیر محمد وحدت، د ملي راډیو تلوېزیون آمر مولوي نظر محمد زاهد د اطلاعاتو او فرهنګ ریاست او ملي تلویزیون امریت ټولو آمرینو، مدیرانو او کارکوونکو سره د یاد ریاست د غونډو په تالار کي ولیدل.
په پیل کي د اطلاعاتو او فرهنګ رئیس الحاج حافظ عبد الباري راشد و مالي او اداري معین ښاغلي مولوي سعد الدین سعید ته ښه راغلاست ووایه او له نوموړي څخه يې مننه وکړه چي هلمند ولایت ته يې سفر وکړ.
ښاغلي راشد د هلمند ولایت د ټولو تاریخي سیمو په اړه د معلوماتو وړاندې کولو ترڅنګ د هلمند ولایت په بېلا بېلو ولسوالیو کي د اطلاعاتو او فرهنګ ریاست د نویو بستونو غوښتنه وکړه ترڅو د ولسوالیو ځوانانو او خلکو ته پر وخت په بېلا بېلو برخو کي خدمتونه تر سره شي.
مالي او اداري معين ښاغلي سعید د رئیس ښاغلي راشد او ملي راډیو تلویزیون د آمر او ټولو کار کوونکو څخه ځانګړې مننه وکړه، چي ورسپارل شوې چارې يې پر وخت سر ته رسولي، ښاغلي سعید هلمند ولایت د شل کلن اشغال پر وړاندي د مبارزې یو بې مثاله ولایت یاد کړ او د هلمندي ولسونو سرښندنې يې وستایلې.
ښاغلي سعيد زیاته کړه موږ ټول باید په ګډه د ملت لاښه خدمت وکړو او د اسلامي نظام ساتنه او پالنه وکړو،اوسنی امنیت د هېواد جوړوني لپاره یو ښه فرصت دی، ترڅو هېواد په هره برخه کي ورغوو.
۲۰۲۴/۴/۲۳ میلادي
۱۴۰۳/۲/۴ هــ ل
