د فرهنګ او هنر معین د جاپان هیواد له سفیر سره د فرهنګي همکاریو په اړه وکتل
د اطلاعاتو او کلتور وزارت د فرهنګ او هنر معین مولوي عتیق الله عزیزي په خپل کاري دفتر کې د جاپان هېواد له سفیر ښاغلي ماساموتو کِینیچي سره د فرهنګي همکاریو او تاریخي میراثونو د ساتنې په اړه ناسته وکړه.
په پیل کې د فرهنګ او هنر معین مولوي عتیق الله عزیزي د جاپان هیواد هغه هڅې وستایلې، چې د افغانستان د لرغونو فرهنګي او تاریخي اثارو د ساتنې او بیارغونې په برخه کې يې ترسره کړي دي.
ښاغلي عزیزي ټینګار وکړ، چې دغه مرستې د هېواد د فرهنګي میراث د خوندي کولو لپاره ډېر ارزښت لري.
په ورته وخت کې، د جاپان سفیر ښاغلي ماساموتو کِینیچي د اسلامي امارت له لوري د تاریخي میراثونو د ساتنې هڅې د پام وړ وبللې او زیاته یې کړه؛ د افغانستان لرغونی تمدن د نړیوال اهمیت وړ دی، د تاریخي سیمو او اثارو ساتنه یوازې د افغانستان د حکومت مسوولیت نه، بلکې د ټولو نړيوالو ګډ مسوولیت دی.
ښاغلي سفیر د افغانستان د اسلامي امارت له لوري د مخدره موادو د مخنیوي ،د فساد په وړاندې مبارزه او دتاریخي اثارو د قاچاق د مخنیوي په برخه کې هڅي بریالۍ او دارزښت وړ وبللې .
دغې ناستې د دواړو هېوادونو تر منځ د فرهنګي اړیکو د پیاوړتیا او د ګډو همکاریو د دوام په اړه یو مثبت پیغام درلود.
۱۴۴۷/۵/۲۷ ھ ق
