د کتاب ارزونې کمېسیون نوبتي غونډه وشوه
دوشنبه (د ۱۴۴۷هـ ق کال د جمادي الثاني ۲۴مه) د اطلاعاتو او کلتور وزارت د خپرونو چارو معینیت اړوند د کتاب ارزونې کمېسیون نوبتي غونډه د خپرونو چارو معین مهاجر فراهي په مشرۍ د کمېسیون د نورو غړو په شتون کې وشوه.
د غونډې په پيل کې د کمېسیون منشي د تېرې غونډې راپور وړاندې کړ او د کمېسيون لاسته راوړنې او فعالیتونه مثبت وارزول شول، په دې غونډه کې د یو شمېر کتابونو په اړه پرېکړې وشوې او هغه کتابونه چې د اسلامي او افغاني ارزښتونو سره سم لیکل شوي وو، د چاپ اجازه یې ترلاسه کړه.
د یادونې وړ ده، چې د غونډې په پای کې ۵ ټوکه هغه کتابونه چې کمېسیون ته د ارزونې په موخه رالېږل شوي وو، د ارزونې لپاره د کمېسیون غړو ته وسپارل شول، تر څو راتلونکې غونډې ته يې راپور وړاندې کړي، همدارنګه د یادې غونډې په ترڅ کې د خپرندویانو ستونزې او وړاندیزونه وڅیړل شول او د کتاب پلورنځیو او کتابتونونو د څارنې موضوع په اړه هم پریکړې وشوې.
