د کتاب لوستنې کلتور د عامولو په موخه روزنیز سیمینار وړاندې شو 

د اطلاعاتو او کلتور وزارت اړوند د عامه کتابتونونو ریاست او د پکتیا اطلاعاتو او کلتور ریاست په ګډو همکاریو د پکتیا ولایت عامه کتابتون کې د کتاب لوستنې کلتور د عامولو په موخه د عامه کتابتون مسؤولينو، خصوصي کتاب پلورونکو او ګڼ شمېر ځوانانو ته یو ورځنی روزنیز سیمینار وړاندې شو. 
مسؤلینو وویل: د اطلاعاتو او کلتور ریاست هڅې کوي، چې د مطالعې کلتور د عامولو، فکري اصلاح او د دیني او عصري علومو په برخه کې د عامه کتابتونونو بډاینې ته کار وکړو، تر څو د کتاب او مطالعې په وسیلې هېواد مو له پرمختللو هېوادونو سره سیال شي.
دغه راز د عامه کتابتونونو رئیس دوکتور رفیع الله صمیم د اسلام له نظره د کتاب، مطالعې ارزښت او اسلامي نړۍ کې د علماوو هڅو، پرمختګونو او اسلامي علم خپرولو په اړه خبرې وکړې. 
ښاغلي صمیم زیاته کړه، چې اسلامي شریعت لومړنی حکم د علم، پوهې، ثقافت او معرفت په هکله کړی دی او ملتونو ته د علم، پوهې او ادب پیغام د اسلامي نړۍ څخه خپور شوی دی. 
په سیمینار کې نورو ویناوالو هم د کتابتونونو پیژندنې، ارزښت، ډولونو، دندو او په څېړنو کې د کتابتونونو اهمیت په اړه خبرې وکړې او زیاته یې کړه، چې عامه کتابتونونه کولی شي د کتاب لوستنې کلتور عامولو کې مهم رول ولوبوي.
د یادونې وړ ده، چې د سیمینار په پای د کتاب لوستلو کلتور د عامولو په اړه د آزاد بحث ترڅنګ په دې برخه کې ستونزې او وړاندیزونه هم مطرح شول او د هنري تابلوګانو نندراتون تر سره شو.

۱۴۴۷/۹/۱ هـ ق