"د کندز فاتح" علمي او جهادي اثر چاپ شو
د جهادي ارزښتونو د ساتنې لوی ریاست اړوند د چاپي نشراتو ریاست له لوري د شهید ملا عبدالسلام بریالي په ژوند او کارنامو لیکل شوی علمي – څېړنیز اثر (د کندز فاتح) چاپ شو.
د یاد ریاست د مسؤلينو په وينا؛ دا کتاب د کندز د معاصر تاریخ له هغو پاڼو پرده پورته کوي، چې د شهید ملا عبدالسلام بریالي او د یاد ولایت د نورو مجاهدینو د قربانۍ او ایثار دریځ په کې د جهاد او مبارزې له اسمانڅکو تکبیرونو سره یوځای په څپو دی، موږ هیله لرو، چې دا کتاب به د راتلونکو نسلونو لپاره د یوه علمي او څېړنیز ماخذ په توګه را څرګند شي او د امریکایي اشغال پر وړاندې به زموږ د معاصر تاریخ یوه مهمه تاریخي دوره د روایت او تحلیل په ګډ چوکاټ کې وڅېړي.
د یادونې وړ ده، چې د جهادي ارزښتونو د ساتنې لوی ریاست په پام کې لري، چې په نږدې راتلونکي کې ورته نور جهادي، علمي او تاریخي اثار د چاپ په ګاڼه سنبال کړي.
۱۴۴۷/۷/۱۷ هـ ق
