سرپل کې د امام زاده یحیی بن زید شهید زیارت د احاطوي دېوال د جوړولو چارې پیل شوې
د سرپل ولایت اړوند د امام زاده یحیی بن زید شهید زیارت د احاطوي دېوال د جوړولو چارې، چې ۷۰ متره اوږدوالی او ۲.۵ متره لوړوالی لري، د څه باندې ۳۰۰ زره افغانیو په ارزښت، د سرپل د اطلاعاتو او فرهنګ رئیس ملا عبدالغفار حقنما، د یو شمېر سیمه ییزو ادارو د مسؤولینو او ولسونو په شتون کې پیل شوې.
د سرپل د اطلاعاتو او فرهنګ رئیس ملا عبدالغفار حقنما د زیارت د احاطوي دېوال جوړول د دغه تاریخي ځای د ساتنې او خوندي کولو په برخه کې مهم وباله او د یادې پروژې له تمویل کوونکي څخه یې مننه وکړه.
نوموړي د تاریخي آبداتو د جوړولو او ساتنې په بهیر کې د اسلامي معمارۍ د اصولو پام کې نیولو او تاریخي ارزښتونو ته د پاملرنې پر اهمیت ټینګار وکړ او د هېواد د تاریخي او فرهنګي میراثونو د ساتنې لپاره یې د دغه ډول ځایونو خوندي کول مهم وبلله.
ورته مهال د یادې پروژې تمویل کوونکي غلام سخي د امام زاده یحیی بن زید شهید زیارت تاریخي ارزښت ته په اشارې سره وویل: د دېوال د جوړولو موخه د زیارت د ساحې ښه ساتنه او د دغه تاریخي میراث د خوندي کولو په برخه کې مرسته کول دي.
دغه راز د سیمې اوسېدونکو د دغه احاطوي دېوال له جوړولو څخه خوښي څرګنده کړه او دغه اقدام یې د یاد تاریخي میراث د ساتنې په برخه کې مهم وبلله.
۱۴۴۸/۵/۷ هـ ق
