فاریاب کې د (امام ابو حنیفه رح باید وپیژنو) تر عنوان لاندې سیالۍ پایلې اعلان شوې

د فاریاب ولایت د اطلاعاتو او کلتور ریاست له لوري د پوهنې ریاست او البرز علمي او فرهنګي ادارې په ګډه همکارۍ په څلورو ولسوالیو اندخوی، قرغان، خانچارباغ او قرمقول کې د ۲۵۰ تنو طالب العلمانو، زده کوونکو او ځوانانو تر منځ د (امام ابو حنیفه رح باید وپیژنو) تر عنوان لاندې لوستنې سیالۍ ترسره شوې وه، چې پايلې يې د يوې غونډې په ترڅ کې اعلان شوې.
د اطلاعاتو او کلتور رئیس مولوي شمس الدین محمدي په خپلو خبرو کې د یادې سیالۍ ترسره کولو څخه موخه د مطالعې دود عامول، له مخکښو دیني او علمي شخصیتونو سره د ځوانانو آشنایي او د ځوان نسل فکري وده یاده کړه، نوموړي وویل: د مخکښو شخصیتونو پېژندنه لکه د امام ابو حنیفه (رح) چې ټول عمر یې د علم، اجتهاد او د دین خدمت ته وقف کړی و، د ځوانانو په فکري ویښتیا کې مهم رول لري.
همدارنګه د پوهنې ریاست استازي د امام ابو حنیفه (رح) په سیرت علمي خبرې وکړې او د زده کوونکو په استازولۍ یو تن د دا ډول کلتوري ګټورو پروګرامونو د دوام غوښتونکی شو.
د یادونې وړ ده، چې د سیالۍ لومړي مقام ګټونکي ته یو پایه لپ ټاپ کمپیوټر، دویم مقام ګټونکي ته یو سیټ زیرک موبایل او له دریم مقام څخه تر لسم مقام ګټونکي ته نغدې پیسې ډالۍ شوې.

۱۷/۱/۱۴۴۷ هـ ق