کازان کې په جوړيدونکي لوی اقتصادي، کلتوري او توريزم فورم کې د اطلاعاتو او کلتور وزير ته د ګډون بلنه ورکړل شوه
د روسیې هیواد په پلازمینه مسکو کې د اطلاعاتو او کلتور وزارت کلتوري آتشې فضل الهادي حمزه د روسيې فدراسيون د کلتور وزارت په مقر کې د روسيې فدراسيون د هنرونو او د خلکو د نوښتونو د ملاتړ څانګې له مرستيال ښاغلي انتون اندرېيويچ کوزنيتسوف، د يادې څانګې د بهرنیو چارو مسئولې آغلې مارييا سېرګېيونا او مرستیال ښاغلي اندريی سره وليدل.
د یادې لیدنې په ترڅ کې د اطلاعاتو او کلتور وزارت ښاغلي وزیر صاحب شیخ شېراحمد حقاني او پلاوي ته په یاد فورم کې د ګډون رسمی بلنلیک ښاغلي انتون اندرېيويچ کوزنيتسوف، ښاغلي فضل الهادي حمزه ته وسپاره.
په دغه ليدنه کې ښاغلي حمزه د ا.ا.ا. د لاسته راوړنو او پرمختګونو په اړه معلوماتو وړاندې کولو ترڅنګ د کلتوري موضوعاتو او توريزم په اړه (روسيه کې د افغانانو لپاره د يو کلتوري مرکز د جوړولو) او یو شمېر نور موضوعات او وړانديزونه شریک کړل.
دغه راز ښاغلي انتون له يادې ليدنې څخه خوښي څرګنده کړه او په یادو شویو برخو کې يې د پوره همکارۍ او ګډ کار کولو ډاډ څرګند کړ.
ښاغلي انتون زیاته کړه؛ د روسيې فدراسيون د کلتور وزارت هم غوښتنه لري، چې د دوی يو لوړ پوړی پلاوۍ افغانستان ته سفر ترسره کړي.
۱۴۴۷/۸/۱۷ هـ ق
