د لرغون پوهنې ریاست مسلکي پلاوي کندوز ولایت ته سفر وکړ
د اطلاعاتو او کلتور وزارت اړوند اړوند لرغون پوهنې ریاست مسلکي پلاوي د کندوز ولايت اطلاعاتو او کلتور ریاست د فرهنګ او هنر آمریت د مسؤلینو په ملتیا د قلعه زال ولسوالۍ لرغونو سیمو د وضعیت څیړلو په موخه سفر وکړ.
د فرهنګ او هنر آمر د دې سفر موخه د قلعه زال د تاریخي سیمو مسلکي او فني ارزونه وبلله او ویې ویل: په کندوز کې د ټولو تاریخي او لرغونو آثارو ساتنه د فرهنګ او هنر آمریت اساسي دنده ده او هېڅ حقیقي یا حکمي بنسټ ته به اجازه ور نه کړل شي چې دا سیمې غصب یا ویجاړې کړي.
د کندوز د اطلاعاتو او کلتور ریاست د مسؤلین په وینا؛ اوس مهال په دغه ولایت کې شاوخوا ۳۲ لرغونې سیمې ثبت او راجستر دي، چې د خوندیتوب په موخه یې وخت په وخت ارزونې او څارنې ترسره کېږي.
مسؤلینو زیاته کړه، چې د افغانستان اسلامي امارت د فرهنګي میراثونو د ساتنې او ژغورنې په برخه کې خپلې هڅې ګړندۍ کړي او د دې ارزښتمنو شتمنیو د قانوني خوندیتوب لپاره به هېڅ ډول هڅې ونه سپموي.
۱۴۴۷/۴/۱ هـ ق
