د اطلاعاتو او کلتور رئیس په تولک ولسوالۍ کې په لاس د قرانکريم له ليکونکي سره وکتل
د غور ولایت د اطلاعاتو او کلتور رئیس مولوي عبدالحي زعیم د دې ولایت ولسوالیو ته د خپل سفر په لړ کې د تولک ولسوالۍ له تاریخي او لرغونو ځایونو، سیمه ییزو مسؤلینو، ډلګۍ مشرانو، فرهنګیانو، نعت ویونکو، لیکوالانو او شاعرانو سره ولیدل.
نوموړي په تولک ولسوالۍ کې له مولوي محمد طاهر سره هم (چې په پنځو کلونو کې یې د قرآن کریم ۳۰ پارې په لاس لیکلي دي) ولیدل، ښاغلي زعیم د مولوي محمد طاهر دغه نادر او نوښتګر کار د ستایلو وړ وباله او د اطلاعاتو او کلتور ریاست، د غور د محلي ادارې مشرتابه او د هېواد د اطلاعاتو او کلتور وزارت له لوري د نوموړي د دغه مهارت په برخه کې لا زیاتو همکاریو ډاډ ورکړ.
دغه راز مولوي محمد طاهر د مننې په څرګندولو سره وویل: دغه ښکلی اثر یې په ځانګړې اسلامي مینه لیکلی دی، د اطلاعاتو او کلتور ریاست څخه یې وغوښتل چې دغه ارزښتمن اثر نندارې ته وړاندې کړي، ترڅو د دیني علومو نور مینوال هم ترې الهام واخلي.
۱۴۴۷/۴/۴ هـ ق
