د کورنيو توليداتو په ملي نندارتون کې یو شمېر لرغوني او فرهنګي اثار نندارې ته وړاندې شول

د خوست ښار د جرګو په تالار کې د کورنيو توليداتو درې ورځني ملي نندارتون کې د خوست د اطلاعاتو او کلتور ریاست بېلابېل لرغوني، فرهنګي، هنري او ادبي آثار نندارې ته وړاندې شول.
د اطلاعاتو آمر وویل: په يادو آثارو کې لرغوني لوښي، پخوانۍ کيمره، سلګونه کاله لرغونې پڼې، تورې، لرغونی ټوپک، د ګڼو برخو کتابونه، مهالنۍ، مجلې، او یو شمېر نور لرغوني توکي له تاریخ، هنر او فرهنګ سره د نوي نسل د اشنا کولو په موخه نندارې ته وړاندې شول. 
د اطلاعاتو آمر زیاته کړه؛ دا ډول پروګرامونه د فرهنګي ارزښتونو په ژوندي ساتلو کې مهم رول لري، نوموړي له ولسونو وغوښتل، چې هغه تاريخي او کلتوري آثار چې له دوی سره په کورونو کې موجود دي، د غوره ساتنې او راتلونکي نسل ته د انتقال په موخه د خوست محلي موزیم ته وسپاري.
دغه راز یو شمېر ننداره کوونکو وویل: په دغه نندارتون کې په ځانګړي توګه د اطلاعاتو او کلتور ریاست په غرفو کې يې ډېری تاريخي او فرهنګي هغه اثار وليدل، چې د لوړ فرهنګي ارزښت لرونکي وو.

۱۴۴۷/۴/۵ هـ ق