د قطر سفارت شارژدافیر د اطلاعاتو او کلتور له وزیر سره وکتل.

سه شنبه ( ۱۴ د ربيع الآخر ۱۴۴۷) په کابل کې د قطر سفارت شارژدافير ډاکټر مردف القاشوطي د اطلاعاتو او کلتور وزارت مقام کې ښاغلي شيخ صاحب شيراحمد حقاني سره د دواړو هيوادونو تر منځ کلتوري اړيکو د پياوړتیا په موخه وکتل. 

په پیل کې د قطر د سفارت شارژدافیر ډاکټر مردف القاشوطي د اطلاعاتو او کلتور وزیر ښاغلي شیخ صاحب حقاني ته د نوې دندې مبارکي ورکړه او د دواړو هېوادونو تر منځ د کلتوري همکاریو په پیاوړتیا او دوام يې ټینګار وکړ، نوموړي د قطر او افغانستان تاریخي اړیکې وستایلې او په کلتوري برخه کې يې د لا زیاتو همکاریو ډاډ څرګند کړ.

د اطلاعاتو او کلتور وزیر ښاغلي شیخ صاحب د افغانستان او قطر تر منځ اړیکې مهمې وبللې، د کلتوري اړیکو او دوه اړخیزو همکاریو د پراختیا په اړه یې خبرې وکړې، همداراز  نوموړي د دواړو هېوادونو تر منځ د کلتوري اړیکو د پیاوړتیا په موخه د تړونونو د څارنې یادونه وکړه او د قطر دولت له هر اړخیزو، په ځانګړي ډول د کونړ له وروستیو زلزله‌ ځپلو سره د مرستو له امله يې مننه وکړه.

۱۴۰۴/۷/۱۵ هـ ل