کونړ کې د سیمه ایزو رسنیو خبریالانو ته روزنیز ورکشاپ ترسره شو
د کونړ د اطلاعاتو او فرهنګ ریاست په همکارۍ د خبریالانو د همغږۍ د اتحادیې له لوري د یونسکو په مالي ملاتړ د کونړ سیمه ایزو رسنیو خبریالانو او یو شمېر امارتي ویاندویانو لپاره یو ورځنی روزنیز ورکشاپ ترسره شو.
د کونړ د اطلاعاتو او فرهنګ رئیس مولوي سمیع الحق حق بیان د خبریالانو د مسلکي روزنې او ظرفیت لوړونې پر اهمیت ټینګار وکړ او ژمنه یې وکړه، چې د خبریالانو د مسلکي وړتیاوو لوړولو او د رسنیو پر وړاندې د شته ستونزو د حل لپاره به لا زیاتې هڅې وشي، نوموړي دغه ورکشاپ د خبریالانو د مسلکي مهارتونو د پیاوړتیا لپاره ګټور وباله.
دغه راز د خبریالانو د همغږۍ اتحادیې مشر محمد ابراهیم امرخېل د ورکشاپ د موخو او څرنګوالي په اړه خبرې وکړې او د خبریالانو او ویاندویانو ترمنځ یې د همغږۍ او مسلکي اړیکو پر پیاوړتیا ټینګار وکړ.
ورکشاپ د اطلاعاتو امر ضیاالرحمن سپین غر له لوري د خبریالانو خوندیتوب او څېړنیزې راپور جوړونې تر عنوانو لاندې ترسره شو.
په پای کې ګډونوالو ته تصدیق پاڼې هم وویشل شوې.
۱۴۴۸/۵/۵ هـ ق
