شاجوی کې په لومړي ځل د کمپیوټر ښوونیز مرکز فعال شو
د اطلاعاتو او کلتور وزارت د ځوانانو چارو معینیت له لوري د زابل ولايت د شاجوی ولسوالۍ ځوانانو لپاره د کمپيوټر ښوونیز مرکز پرانستل شو.
د یاد مرکز د پرانستې مراسمو کې د ځوانانو چارو معین قاري محمد یونس راشد، د زابل د ځوانانو چارو آمر ملا عصمت الله شکیب اغا، د پوهنې رياست مسؤلینو او ځوانانو ګډون کړی وو.
د ځوانانو چارو معین قاری محمد یونس راشد وویل: د شاجوی ولسوالۍ د ځوانانو په غوښتنه یې دغه ښوونیز مرکز فعال کړ، دې ښوونیز مرکز ته به پراختیا ورکوو او په دې ښوونیز مرکز کې به د تدریس تر څنګ د ځوانانو د فکري اصلاح، اقتصادي پیاوړتیا پروګرامونه او سمينارونه ترسره کېږي.
په ورته وخت کې د دې ولسوالۍ ځوانان خوښ دي، چې يو ستر خدمت ورته کیږي او په خپله ولسوالۍ کې ورته مجهز ښوونیز مرکز فعاليږي، د دوی په خبره مخکې به یې ځوانان نورو ځایونو ته د زده کړې لپاره تلل او یا به هم بې زده کړو پاتې کېدل، ولي اوس دا زمینه په خپله ولسوالۍ کې ورته برابره شوه.
۱۴۰۳/۱۱/۷ ل
۱۴۴۶/۷/۲۵ ق
