تخار کې (کتاب، د سبا په لور پل) په نوم کنفرانس جوړ شو
په تخار ولایت کې د اطلاعاتو او کلتور ریاست اړوند د فرهنګ او ګرځندوی آمریت له لوري (کتاب، د سبا په لور پل) په نوم علمي کنفرانس د یاد ریاست په عامه کتابتون کې جوړ شو، په دغه علمي او فرهنګي کنفرانس کې یو شمېر علمای کرامو، فرهنګیانو، ځوانانو او د رسنیو استازو ګډون کړی وو.
د فرهنګ او ګرځندوی آمر د کتاب او مطالعې د ارزښت په اړه وویل: هغه ولسونه چې له کتاب او تحقیقاتو سره ژوند کوي، د نړۍ مخکښ، رهبران او واکمنان دي، خو هغه ملتونه چې ځوانان یې له مطالعې او څيړنو څخه لرې وي، حتمي به د ناپوهۍ، ذلت او بېلارۍ ښکار شي.
ورپسې نورو ویناوالو د علم، کتاب او د ټولنو د پرمختګ او دنیا او اخرت د نیکبختۍ په برخه کې د مطالعې د ارزښت په اړه خبرې وکړې او له ځوانانو څخه یې وغوښتل، چې مطالعه او څېړنه پرینږدي او د خپل ملت راتلونکی د ناپوهانو لاسونو ته ونه سپاري.
د کنفرانس په پای کې ګډونوالو د دې علمي کنفرانس د جوړېدو له امله د اطلاعاتو او کلتور ریاست څخه مننه وکړه او ټینګار یې وکړ، چې د ځوانانو فکري ودې لپاره د باید دا ډول نور پروګرامونه هم جوړ شي.
۱۴۴۷/۴/۲۶ هـ ق
