د کډوالو له لنډمهالي کمپ څخه لیدنه وشوه
د اطلاعاتو او فرهنګ وزارت اړوند د باختر خبري آژانس رئیس او هم مهاله د کډوالو د عامه پوهاوي کمېټې مسؤول مولوي احسان الله حسان او د کابل ولایت د اطلاعاتو او فرهنګ رئیس مولوي شمس الله زبیر په کابل کې د کډوالو له لنډمهالي کمپ څخه لیدنه وکړه.
د لیدنې پر مهال د کډوالو د عامه پوهاوي کمېټې فعالیتونه وارزول شول او له کډوالو سره د ترسره کېدونکو عامه پوهاوي فعالیتونو بهیر، د هغوی اړتیاوې او ستونزې وارزول شوې.
ښاغلي حسان وویل: کډوالو ته د دوی د وضعیت، شته خدمتونو او اړوندو موضوعاتو په اړه لازم معلومات وړاندې کول او د عامه پوهاوي پروګرامونه لا اغېزمن کول د کډوالو د عامه پوهاوي د کمېټې دنده ده.
ورته مهال، د کابل د اطلاعاتو او فرهنګ رئیس مولوي شمس الله زبیر د کډوالو لپاره د عامه پوهاوي پر اهمیت ټینګار وکړ او د دې برخې د فعالیتونو د لا ښه ترسره کېدو او همغږۍ پر پیاوړتیا یې خبرې وکړې.
د لیدنې په پای کې، دوی د کډوالو د عامه پوهاوي د فعالیتونو پر پیاوړتیا او کډوالو ته د اړینو معلوماتو پر رسولو ټینګار وکړ.
۱۴۴۸/۵/۵ هـ ق
