کاپیسا کې د امارتي ادارو ویاندویانو، د رسنیو مسؤلینو او خبریالانو سره د همغږۍ ناسته وشوه
د کاپیسا اطلاعاتو او فرهنګ ریاست له لوري د امارتي ادارو له ویاندویانو، د رسنیو له مسؤلینو او خبریالانو سره د دوی د ستونزو حل، له خبریالانو څخه ملاتړ او د اطلاع رسونې چارو ښه والي په موخه د همغږۍ ناسته وشوه.
د کاپیسا د اطلاعاتو او فرهنګ رئیس د خلکو او نظام ترمنځ د باور، پوهاوي او همغږۍ په رامنځته کولو کې د رسنیو رول مهم وباله او ویې ویل: رسنۍ د فکري ودې او عامه پوهاوي په زیاتوالي کې اغیزمن رول لري.
د اطلاعاتو او فرهنګ رئیس زیاته کړه؛ د خبریالانو لپاره د کاري اسانتیاوو برابرول، معلوماتو ته پر وخت لاسرسی او د امارتي ادارو او رسنیو ترمنځ د بشپړې همغږۍ ساتل د اطلاعاتو او فرهنګ ریاست له مهمو لومړیتوبونو څخه دي، نوموړي د امارتي ادارو له ویاندویانو څخه وغوښتل چې کره، مسؤلانه او پر وخت معلومات له رسنیو سره شریک کړي.
د غونډې په ترڅ کې د رسنیو مسؤلینو، خبریالانو او د امارتي ادارو ویاندویانو خپل نظرونه، ستونزې او وړاندیزونه مطرح کړل، هغوی د اطلاعاتو او فرهنګ ریاست له لوري د ورته همغږیو غونډو جوړول ګټور وبلل او د داسې غونډو د دوامداره ترسره کېدو غوښتنه یې وکړه.
د غونډې په پای کې د ګډې همکارۍ او دوامداره همغږۍ پر اهمیت ټینګار وشو او پرېکړه وشوه، چې د رسنیو ستونزو د حل، له خبریالانو څخه د ملاتړ او معلوماتو ته د لا اسانه لاسرسي د برابرولو لپاره به دا ډول غونډې دوام ومومي.
۱۴۴۸/۱/۲ هـ ق
