د اطلاعاتو او فرهنګ وزارت او کابل ښاروالۍ ترمنځ د تاریخي میراثونو د ساتنې په اړه د همغږۍ غونډه ترسره شوه
د اطلاعاتو او فرهنګ وزارت مسؤلینو او د کابل ښاروالۍ مسؤلینو ترمنځ د تاریخي ارزښتونو د ساتنې، د فرهنګي میراثونو د پیاوړتیا او د کابل ښار د تاریخي سیمو د لا ښه مدیریت په موخه د همغږۍ غونډه ترسره شوه.
په دې غونډه کې د اطلاعاتو او فرهنګ وزارت د فرهنګ او هنر معین شیخ عبدالرحمن طیبي، د کابل ښاروال مولوي عبدالرشید، د کابل ښاروالۍ د ټولنیزو او فرهنګي چارو معین حاجي محمد نبي عثماني او د دواړو ادارو یو شمېر رئیسانو او مسئولینو ګډون کړی و.
په غونډه کې د کابل ښار د تاریخي او فرهنګي میراثونو او همدارنګه د بابر بڼ، چهلستون بڼ او د تیمورشاه مقبرې او پارک د لا ښه مدیریت او ساتنې اړوند پر بېلابېلو موضوعاتو بحث وشو.
د کابل ښاروال مولوي عبدالرشید د ښار د تاریخي هویت د ساتنې پر اهمیت ټینګار وکړ او ډاډ یې څرګند کړ، چې د کابل ښاروالۍ پلانونه د تاریخي او فرهنګي ارزښتونو په پام کې نیولو سره جوړ او پلي کېږي.
نوموړي زیاته کړه، چې ښاري پراختیا باید داسې ترسره شي ترڅو له یوې خوا د ښار د اوسېدونکو اوسنۍ اړتیاوې پوره او معیاري زیربناوې رامنځته او له بلې خوا د کابل تاریخي هویت او فرهنګي میراثونه هم خوندي وساتل شي.
ورته مهال د اطلاعاتو او فرهنګ وزارت د فرهنګ او هنر معین شیخ عبدالرحمن طیبي د کابل ښاروالۍ د فعالیتونو او زیربنایي پروژو د پلي کېدو ستاینه وکړه او زیاته یې کړه، چې کابل د ستر تاریخي شالید لرونکی ښار دی او تاریخي او فرهنګي میراثونه یې باید خونديې وساتل شي، بیارغونه یې وشي او راتلونکو نسلونو ته خوندي ولېږدول شي.
په پای کې د دواړو ادارو ترمنځ د تاریخي سیمو د لا ښه مدیریت، د فرهنګي میراثونو د ساتنې او د کابل ښار د متوازنې او دوامداره پراختیا په موخه پر دوامدارې همغږۍ او همکارۍ ټینګار وشو.
