بغلان کې يو مهم لرغونی تاريخي اثر ترلاسه شو
د بغلان اطلاعاتو او کلتور ریاست د امنیتي ارګانو په همکاریو د سلګونه کلونو تاريخي مخینې درلودونکی اثر ترلاسه کړ.
د اطلاعاتو او کلتور رئیس وویل: یاد اثر له برونزو جوړ دیګ دی، چې د دوشي ولسوالۍ اړوند د اسلام کلا او کیله ګي سیمو اوسیدونکو له لوري په غیر قانوني توګه ساتل کیده، چې له ترلاسه وروسته د بغلان محلي موزیم ته وسپارل شو.
د اطلاعاتو او کلتور رئیس زیاته کړه؛ که څه هم په دقیقه توګه د یاد اثر تاریخي مخینه تردې مهاله نه ده معلومه، مګر د لومړنیو څیړنو له مخې تاریخي مخینه یې سلګونو کلونو ته رسیږي.
د اطلاعاتو او کلتور رئیس د تاریخي ځایونو او آثارو ساتنه د اطلاعاتو او کلتور ریاست له کاري لومړیتوبونو څخه وبلله او د بغلان له اوسیدونکو څخه یې وغوښتل، چې د محلي موزیم د غني کولو په برخه کې پوره همکاري وکړي.
۱۴۴۷/۹/۷ هـ ق
